Guraso batzuk hurbiltzen zarete guregana, udaleko gazteria sailera, zuen seme-alabei zuzendutako egitarau eta zerbitzuen inguruan galdetzera, zuen kezkak azaltzera… uste dut oso komenigarria dela zuen jarrera aktiboa eta parte hartzea gure lan arloan eta gurekin harremanetan jarraitzera animatu nahi zaituztet. Ondo legoke gure aldetik ere zuei informazioa helarazteko bide berriak irekitzea eta blog hau horietako bat izan daiteke.

Testua: Blanka Jauregi

Imagen 15

Hasteko, gune hau aprobetxatu nahi dut Arrasateko udalekogazteria arloaren nondik norakoak azaltzeko, zuek ere ikuspegi oso bat izan dezazuen.

Arrasateko Udaleko gazteria arloa

Helburu orokorra. Herriko gazteei begira lan egiten dugu, haien garatze prozesuan era positiboan eragiteko asmoz. Zentzu honetan, haiei zuzendutako baliabide, zerbitzu eta ekimenak bultzatzen ditugu, hauek hain zuzen:

ZERBITZUAK:

  1. Gazteentzako informazio bulegoa: gazteen intereseko gaien inguruan informazioa zabaltzea eta gazteekin komunikazioa lantzea ditu helburu. Teknologia berrien eraginez, azken urteotan informazioa zabaltzeko era asko aldatu da: gero eta gehiago internet bidez (web gunea, aldizkari elektronikoa, RSSak) eta SMS bidez zabaltzen da. Informazioaren esparruan gazteen parte hartzea bultzatzeko helburuaz ekimen ezberdinak bideratzen ditugu zerbitzutik: “Gomendatzen dizut” saria, korrespontsalak ikastetxeetan, udako kanpaina, …  Helbidea: www.gaztebulegoa.com
  2. Ludotekak eta Gazte txokoak: haur eta nerabeei zuzendutako aisialdi gune hezitzaileak, zeinetan ondo pasatzeaz gain, hainbat balore eta jarrera lantzen diren (berdintasuna, elkarlana, errespetua, erantzukizuna, parte hartzea…). Aisialdi eskaintza honetan garrantzi handia ematen diogu euskararen erabilera sustatzeari. Ludotekak:3-11 urte bitarteko umeei zuzenduta daude eta Erdialdean, Santa Marinan eta Uribarri auzoetan kokatuta daude. Helbidea: goiena.net/blogak/ludotekak.Gazte txokoak: 12-17 urte bitarteko nerabeei zuzenduta, Musakola, San Andres eta Erguin auzoetan daude. Erdialdean aisialdi eskaintza faltaz jabetuta, era honetako gune bat sortzeko asmoa du Udalak, batez ere asteburuetako aisialdiri bideratua. Hebidea:goiena.net/blogak/gaztetxokoak. Ludotekak eta gazte txokoak Txatxilipurdi elkartek kudeatzen ditu (zerbitzu kontratua sinatua du Udalak elkartearekin).
  3. Sexologia Zerbitzua: sexologiaren alorrean informazio eta aholkularitza publikoa eskaintzeaz gain, herri osoari begirako ekimenak bultzatzen ditu (sentsibilizazio kanpainak, ikastaroak, erakusketak, argitalpenak, zine eta antzerki emanaldiak, hitzaldiak, e.a.). Arreta bulegoa gazte bulegoaren eraikinean bertan dago: Garibai Etxean, Biteri etorbidea, 3. Zerbitzu hau emakume eta gazteria sailen elkarlanetik sortu zen eta bien ardurapean dago. Muxuka elkarteak kudeatzen du (zerbitzu kontratua). Helbidea:www.sexologiazerbitzua.com
  4. Kale heziketa: nerabeei zuzendutako egitaraua, ingurune irekian gizarte heziketa lantzeko. Honen bidez, arrisku egoerak detektatu eta gainditzeko esku hartzeak bideratzen dira. Esku-hartzeak, kasuaren arabera, banakoak, taldekakoak eta komunitatekoak izango dira. Zerbitzu hau gizarte-ongizate eta gazteria sailen elkarlanetik sortu zen eta bien ardurapean dago. Kalexka elkarteak kudeatzen du (zerbitzu kontratua).

 BALIABIDEAK:

  1. Gaztetxea: gazteen ekimenak era autogestionatuan bideratzeko ekipamendu bat da, lagapen hitzarmen baten bidez, Udalak Gazteriaren Kontseiluari utzita diona. Batez ere asteburuetan funtzionatzen da, ostiraletan asanbladak ospatzen ditu, nahi duten gazteentzako irekiak. Ekintzak: kontzertuak, jaiak, hitzaldiak, …
  1. Entsegu lokalak: herriko musika taldeek entseatzeko guneak dira. Kasu honetan ere, lagapen hitzarmen bat sinatua du Udalak Depos-Gaz musika taldeen elkartearekin. Guztira, 14 lokal daude, 2 eraikinetan banatuta (Uarkapen eta Musakolan).
  2. Dirulaguntzak: gazteen ekimenak gauzatzen laguntzeko helburuaz urtero egiten du Udalak dirulaguntza deialdia; 2 modalitate: herriko gazte elkarteei zuzendutakoak eta musika grabaketak egiteko laguntzak; horiez gain, gazte sortzaileen lana sustatzeko edota gazteei zuzendutako ekimenak burutzeko laguntzak ere onartu izan dira sailetik (komikigile gazteei, kontzertuak antolatzeko, …) eta baita udalekuetan parte hartzeko laguntzak ere (gizarte zerbitzuetako egitarau zehatz batzuetako onuradunak diren familiei zuzendutakoak).

 EKIMENAK

Ikastaroak: zaletasun ezberdinak eta parte hartzea sustatzeari begira, hainbat ikastaro antolatzen ditugu urtean zehar (txalaparta, argazkigintza, bitxigintza, dantza, sukaldaritza, bideogintza, komikigintza, larrugintza, …), horietako batzuk herriko elkarteekin elkarlanean (Lore Gazteak, Ttakun txalaparta taldea, …).

Kontzertuak: Foru aldundiko Gaztemaniak! Izeneko egitarauaren barruan, kontzertu batzuk antolatzen ditugu herrian urtean zehar, azkenak Gaztetxearekin batera elkarlanean.

Honaino Arrasateko Udaleko gazteria sailaren egungo egitekoa. Zuen komentarioak eta ekarpenak egitera animatzen zaituztegu, blogaren bidez edo bjauregi@arrasate-mondragon.net helbidera idatzita. Laster arte!

Argazkiaren iturria