Gure gorputza hobeto ezagutzeko, 3 eta 6 urte arteko umeei zuzendutako saioa du Suediako telebista publikoak. Kapituluetako bat sexu-organoei eskaini diete eta marrazki bizidunetako alu eta zakilekin bideo dibertigarria egin dute umeentzat, sarean arrakastatsu zabaldu dena. “Hemen dator zakila, azkar asko”, “bagina aparta da”, “zakila eta bagina, ze bikote ederra” gisako esaldiek osatzen dute bideoaren kantua.

http://youtu.be/qOkH5068A0k

Argia aldizkariko Mikel Garcia Idiaquezek azaltzen duenez Suedian 11 urterekin lantzen dute gaia ikastetxeetan.

“Marrazki bizidunek Interneten sortutako ikusminetik harago, sexu heziketak leku garrantzitsua du gizarte suediarrean. Ikastetxeetan derrigorrezko ikasgaia da 1956. urtetik, 11 urterekin (lehenago ez bada) hasten dira lantzen eskolan eta institutura arte ematen dute. Sexu heziketa hainbat ikasgaitan dute txertatuta, ez soilik biologiari edo osasunari lotuta”, irakurri diogu.

Gurean aldiz, sexu heziketa ikastetxeetan oso mugatua dela dio Garciak, eta Eskoletan ilunpean dagoen ikasgaia erreportajea aipatzen du. “Ordu kopurua mugatua da, legez ez da bultzatzen, eta edukiak gaixotasunen eta tratu txarren prebentzioan oinarritzen dira. Olatz Berastegi sexologoaren hitzetan: “Ondorioz, sexuaren inguruko mezu ezkorra helarazten zaie haur eta gazteei: arriskutsua dela, kontuz ibiltzeko…”.

Captura de pantalla 2015-01-27 a las 11.28.45