Ainara Huizik umeentzako yoga saioak egiten ditu, Oñatin (Gipuzkoa). Lau eta bost urte bitarteko umeak ditu yoga haur taldean. “Alabaren jaiotzarekin piztu zitzaidan interes/pasio bat eraman ninduena formatzera. Esaterako, pedagogia alternatiboetan eta Montessori pedagogian bereziki, yogan… Yoga, beti ere, haurren heziketarekin lotuta”, azaltzen du Huitzik.

Captura de pantalla 2015-05-11 a las 14.33.43

Jarduera betea

Huizik azaltzen du Yoga oso jarduera betea dela, eta horregatik dela hain interesgarria umeekin lantzeko. “Haurra modu integralean lantzeko aukera ematen du. Aspektu fisikoan indarrak, oreka, koordinazioa, gorputzaren ezagutza eta kontzientzia, alineamentua… lantzen dira; aspektu emozionalean prozesu emozionalen oreka, auto-estimua, auto-konfiantza, elkartasuna… lantzen dira; eta aspektu kognitibo-intelektualean bi hemisferioak aktibatzen ditu, burmuinaren oxigenazioa hobetzen du eta asko hobetzen du atentzioa enfokatzeko gaitasuna”, azaldu du Huizik.

Umeentzako yoga saioen egitura

“Interesgarria iruditu zaidan guztiarekin fusioa egiten dut saioetan”, azaltzen du Huizik. “Yoga egiten dugu errespetatuz pedagogia alternatiboaren begirada horrekin; haurrarekiko begirada zintzo horrekin”. Mindfulness kontzeptua ere erabiltzen du Huizik bere azalpenetan. “Oso interesgarria da atentzioaren entrenamendurik onena delako, bai bizitzarako bai bizi-akademikorako”, azaltzen du.

Huiziren esanetan despistatzea gauza naturala da, “baina konturatzen bagara despistatu garela aukera daukagu berriz enfokatzeko”, dio. Emozioekin berdina gertatzen dela azaltzen du. “Haserretu garela konturatzen bagara gaitasun hori landu dugulako beti dugu aukera erreakzio automatikoan ez erortzeko eta erantzun kontziente bat emateko. Haurrak bizi-baliabide garrantzitsuak jaso ditzake txikitatik”.

Saioak era ludikoan eta dinamikoan egin beharra dagoela dio Huizik. Mozorroak, ipuinak… erabiltzen dituzte. Ordu eta laurdeneko saioak izan ohi dira eta egitura bat badaukate ere gidaria haurra da, haurraren une horretako beharrak.

Sarrera edo sintonizazioa da lehenengo urratsa. Ondoren, beroketa ariketak edo gimnasia zerebrala egiten dituzte tentsioak askatzeko. Hirugarren atala posturek edo asanek osatzen dute, emozioekin lotuta beti ere eta ipuinekin, olerkiekin, abestiekin zein antzerkiarekin lagunduta. Jarraian datoz erlaxazioa eta amaiera.