PSIKO… zeeeer?

Inguruarekiko erlazioan haurrari psikologikoki zein fisikoki,heldutasunerantz bidea  eraikitzen laguntzen dion  Bernard Aucouturierren ildo espresionista oinarritzat duen praktika da. Praktika honek haurrari bere benetako ardurak eta kezkak lantzeko aukera eskaintzen dio eta aldi berean, bera den hori osotasunean espresatzeko aukera, inongo epaiketarik gabe.

Honetan guztian, psikomotrizistaren figurak presente izan behar ditu haur bakoitzaren nortasuna eta haurrak heltze prozesuan barrena egiten dituen  ibilbide unibertsalak:

• Atxikimendutik autonomiara: loturarik gabe ez dago banaketarik.

• Suntsiketatik eraikuntzara: kaosetik dator ordena.

• Ekitetik pentsamendura: ekintzarik gabe ez dago pentsamendurik.

Psikomotrizitatearen helburuak:

• Haurraren funtzio sinbolikoa garatzen laguntzea: haurrari marko seguru batetan plazerez ekinez, jolastuz eta sortuz, ekiteko plazeretik pentsatzeko plazerrerako prozesuan aurrera egiten lagunduko dio.

• Angustiekiko asegurazio prozesuaren garapenean laguntzea: psikomitrizitate praktikan haurrak bere barne angustiekiko distantzia hartzen du eta horien jabe egin  jolasaren bidez.

• Deszentrazio prozesuaren garapenean laguntzea: deszentratzeak haurra pentsamendu intelektualera gerturatzen du. Pentsatzeko plazerra beharrezkoa da ikasteko eta ezagutza barneratzeko.

Psikomotrizitate praktikaren metodologia:

• Sarrerako erritua: haurrak aretora ekartzen duen hori osotasunean entzun eta hartzen du psikomotrizistak. Honez gain, haurrek saioan zehar egingo dituzten proiektuen inguruan adierazpen batzuk egiten ditu eta psikomotrizistak psikomotrizitate praktikan oinarrizkoa den araua gogorarazten die: “ezin da minik hartu, ezta eman ere”. Azken batean, sarreratxo honen helburua haurrak komunikaziora ireki eta jolasean hasteko lasaitzean datza.
• Espresibitate motriza: haurrak bere gorputzaren abileziak proban jartzen ditu  gune sentsorio-motorean  salto, igo-jaitsi eta  korrika eginez. Behin bere tentsioak askatu eta sakonki ziurtasun bat hartzen duenean, jolas sinbolikoari ematen dio hasiera, benetan ardura zaizkion fantasien inguruan jolas eginez.

• Ipuina: haurrak ipuinaren bidez apurka-apurka mugimendutik distantzia hartuz pentsamendurako bidea hartzen du.

• Errepresentazioa: egurrezko blokeekin eraikiz, marraztuz edota plastilinarekin modelatuz haurrak bizi duen hori adierazteko saiakera egiten du mugimendu eta emozioetatik at.

• Bukaerako erritua: haurrari bizi duen horri hitzak jartzeko aukera eskaintzen zaio.

Azalpen labur honen ostean, zuetariko norbaiten haurrari psikomotrizitateko saio hauetan parte hartzea gustatuko balitzaioke, jakin ezazue egun Arrasateko Herri Eskolan 2- 5 urte bitarteko haurrek (bertan matrikulatutakoek) aukera dutela praktika hau burutzeko eskola orduetatik at. Honez gain, Elorrioko Txintxirri Ikastolan  2-3 urte bitarteko edozein haurrei  ere (ez dago zertan Ikastolan bertan matrikulatuta egon) irekita dago taldea.

Bestetik, norbaitek gai honen inguruan interes bereziren bat izango balu, www.guraso.com web guneko galderen txokoan sartu eta idaztera gonbidatzen zaituztegu.

Argazkiaren iturria