“Poltsikoko telefonoak eta antzerako gailuak komunikatzeko ezinbestekotzat bihurtu dira
gure artean, baina komunikazioaz harago beste balio batzuk ere badituzte. Bote-prontoan datozkit…”. Honela hasten du Usoa Agirrek bere gogoeta PUNTUA aldizkarian. Hemen jarraipena:

6824579101_e577c1f09e_b

 

. Maila soziala: Appleren azken keynote-an iragarri duten aparailua eskuratzen duenak dirua du eta jantzia dago azken tendentzietan. Gure gizartean horrek maila sozial handia ematen dio pertsona horri.

. Talde bateko partaide izatea: lagun talde batean Whatsappez komunikatzen hasten badira eta lagun batek ez badu erreminta hori, ez da txutxu-mutxuez eta planetaz enteratuko eta taldetik baztertua sentituko da.

. Guaitasuna: batzuetan maila sozialarekin lotuta doa, gailu berriena duena izan daiteke guaiena. Baina beste batzuetan justu kontrako efektua lortu nahi da: poltsikoko retroak, sare sozialetan ez egotea… Besteengandik ezberdindu nahi da, nahiz eta batzuetan ez konturatu hori ere “modan” dagoela.

Ai! Zein zaila den ezberdina eta originala izatea, eta lagunak edukitzea! Horiek guztiek eragiten digute adinez nagusioi. Eta baita nerabeei ere. Izan ere, askotan, badirudi gaur egungo gaztetxoek gailu elektronikoekin dituzten arazoak isolatuak direla. Noski, nerabezaroan larriagoak dira, baina ez dira hutsetik sortu.

Kezkatzen gaitu:
• Nerabeek Interneten partekatzen dutenak. (Gure artean ere, zer partekatzen dugu? Askotan, etikaren eta moralaren mugetan dabiltza eduki asko)
• Ohera eramatea tableta edo poltsikokoa. Zenbait ikerketaren arabera, lo hartzea zailagoa da ordura arte pantailari begira egon bagara, eta ohean poltsikokoa izateak lotarako ordua ere atzeratzen du. (Zer egiten dugu guk? Noiz begiratzen diozu azkenekoz poltsikokoari? Etxera sartu eta sarreran lagatzen duzu?)
• Poltsikokoari kasu handiagoa egitea gure buruari baino. (Nola jokatzen dugu guk? Seme-alabekin gaudenean poltsikokoa kontsultatzen dugu etengabe?)
• Eskolan poltsikokoa piztuta izatea. (Helduen eskola askotan entzuten ditut nik ere ikaskideen mezuen jakinarazpenak…)

Seme-alabek gailu elektronikoen erabilpen ona egitea nahi badugu guztiok hasi behar dugula horretan iruditzen zait. Ez gara natibo digitalak, baina ikastea ez da sekula kaltegarri izango. Hezkuntza ezinbestekoa da, nagusiongandik hasita. Bestela, Taiwanen egin duten moduan, tableten eta poltsikokoen erabilpena debekatuko dugu. (Oraingoz, 2 urtetik beherakoendako, baina ikusiko da…)

Puntua012-UsoaAgirre

Argazkiaren iturria hemen.