Quantcast
Guraso.eus

Plana familian: Arditturriko bide berdea (Oiartzun)

Arditurriko bidegorriaren ibilbidea oinez edo bizikletaz egin daiteke. Bideak lotzen ditu Pasaiako badia eta Aiako Harriko Parke Naturala Pasai Antxo, Lezo, Errenteria eta Oiartzun zeharkatuz. Ibilbide harrigarri horretan inguru horretako ondarearen hainbat aztarna ikusiko ditugu: errotak, dorretxeak, galeriak, meategi-sarrerak, aireztapen-putzuak, karea egiteko labeak eta abar.

Ibilbide amaieran dagoen Arditurriko meatze-esparruak ematen dio izena bidegorriari. Bertan aurkitzen da Arditurriko Interpretazio Zentroa (Aiako-Harria Parke Naturala).

Argazkiaren iturria: Oarsoaldea

Asfaltozko bidea du Arditturriko bidegorriak, eta lauzatua da. hamalau kilometroko joan-etorria da eta zailtasun maila errazekoa. 165 metroko desnibela du, bataz batekoa %2,2 da. Oinez egiteko hiru ordu eta erdi behar dira. Bizikletan, berriz, ordu eta laurden.

Haur txikiekin proposamena da ibilbideari ekitea Oiartzungo Altzibar edo Ugaldetxo auzoetatik. Ibilbide botanikoa deiturikoan egingo ditugu lehen kilometroak eta 125 landare espezie bizi diren gunetik igaroko gara.

Altzibar auzoan bertan ikustekoa da Ugarteko Errota. Edertasun arkitektoniko handiakoa da eta ondo zainduta dago. Arditurriko bidegorria errotez, dorrez eta burdinolaz inguratuta dago. Bidea ondo markatuta dago.

Ibilbidearen azken zatian, Arditurrira iritsiko gara. Hogei mendeko historia duen meatze gunea da; izan ere, erromatarrek I. mendean galena zilarduna ateratzen zuten bertatik. 1986. urtera arte mantendu zen ustiapena. Oraindik ere ikusgai daude azpiegitura batzuk eta bisita gidatuak ere egiten dituzte. Bi kilometro baino gehiago dituzten erromatarren galeriak ikus daitezke.

Bidegorri hau, bestalde, Aiako Harriko magaleraino iristen da. Euskal Herriko multzo granitiko bakarra da. Duela 300 milioi urte inguru sortu zen eta 800 metroko harritzar honek haran osoa hartzen du azpian. 3.000 hektarea biltzen ditu eta Gipuzkoaren eta Nafarroaren arteko muga naturala osatzen du. 1995ean Parke Natural izendatu zuten.

Argibide gehiagorako:
943 494 521
arditurri@arditurri.com
www.arditurri.com
Informazioa pdf formatuan hemen.

Argazkia: Javier Vazquez.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading