Quantcast
Guraso.eus

Nola ulertu behar dugu ‘Fortnite’ fenomenoa?

Emoki kooperatibako Urko Fernandezi galdetu diogu, eta adierazi du aisialdi digitalak asko egin duela aurrera. “Gazteentzako egindako aplikazioak sortu zituzten, baina haurrengana ere iristen ari dira, gaur egun. Fortnite da adibideetako bat. Ez da bideo-joko bat sare sozial bat baizik. Azken finean partida bakoitzean ehun bat lagunek har dezakete parte. Horietako asko ingurukoak eta benetako lagunak izango dira, baina beste asko ez”, dio adituak. 

Azaltzen du Fortnite-k oso erakargarriak diren elementu asko nahastu dituela, eta oso produktu indartsua dela. “Haur eta nerabe asko Fortnite-n sartzen dira lagunekin egoteko. Jolasteko eta lehiatzeko ere bai noski, baina batez ere lagunekin egoteko. Batzuetan partida hasi eta berehala hiltzen zaituzte, baina hor gelditzen zara partida jarraitzen, eta lagunekin hitz egiten. Eta hori da erakargarri egiten duena”. 

Doakoa, baina dirutza ematen duena

Fortnite doako joko bat da, eta besteak beste horregatik du duen arrakasta. “Sarbide mugarik ez dauka. Nahikoa da kontsola bat, mugikor bat, tablet bat edo ordenagailu bat aplikazioa jaisteko eta erabiltzen hasteko. Berdio dio, gainera, zein plataformarekin ari zaren. Edozeinetik egin daiteke jolasean. Horrek, berez, sekulako dimentsioa hartzeko aukera eman dio Fortnite-ri. Milioika eta milioika pertsona daude hor egunero”. 

Eta nahiz eta doakoa izan ez dago jokorik une honetan diru gehiago irabazten duenik Fernandezen esanetan. “Fortnite-k irabazten ditu urtero 3.000 milioi dolar. Diru kopuru hori ez du Sony enpresak irabazten Play Station-ekin. Nola egiten dute dirua? Ba saltzen dituzte dantzak, parapentearen itxura, eta antzerako elementu kosmetikoak. Benetan engantxatuta daudenak erosketak egiten dituzte eta hilero 50, 200 edo 500 eurokoak. Orduan, tranpa moduko bat da eta engantxatzen bazara joko hau ez da merkea. Inpultso kontsumista kontrolatzen ez duenak diru asko gastatuko du”. 

Zein dago ‘Fortnite’-ren atzean? 

Epic Games du izena enpresak, eta aurretik ere joko digital asko sortutakoak dira. Gero, edonork eros ditzake akzioak eta sartu zen Txinako Tencent konpainia. Kuriosoa da; izan ere, Fortnite debekatuta dago Txinan, baina kanpoan egiten dute dirua. Enpresa amerikarrak ere badaude. “Ari dira dirua egiten batez ere haurren despistearen eta engantxearen harira”, dio Fernandezek. 

Adituaren esanetan dibertsitatearen alde egin beharko genuke hezitzaileek. “Ez da ona bakarrik Fortnite-an ibiltzea ona ez den moduan bakarrik musika talde bat jarraitzea edo liburu bakar bat irakurtzea… Dibertsitatea sustatu beharko genuke Interneten ere bai. Testuinguru digitalean ezagutu behar dira beste joko eta beste esperientzia batzuk egon badaudelako”.

Argazkiaren Iturria hemen

Entzun elkarrizketa

 

 

One thought on “Nola ulertu behar dugu ‘Fortnite’ fenomenoa?

  1. Pingback: Nola ulertu behar dugu Fortnite fenomenoa? – Emoki

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading