Erraza, merkea eta ekologikoa da modelatzeko orea edo plastilina etxean egitea. Gainera, ziur jakingo dugu ez dela toxikoa. Animatzen zarete? 40 bat minutuko lana izango da.

Osagaiak

  • katilu bat irin.
  • katilu erdi gatza.
  • katilu erdi bikarbonato edo zorro bat legami kimikoa.
  • koilara bat landare-olio.
  • katilu bat ur beroa.
  • jangarriak diren koloratzaileak.
  • esentzia olioak (nahi bada).

Nola egin

1. Lapiko batean nahastu osagai lehor guztiak. Jarraian, gehitu olioa lehenengo eta ura gero. Poliki-poliki nahastu.

2. Su ertainean berotu beti ere nahasteari utzi gabe. Nahasketa sendotzen joango da.

3. Orea lapikotik askatzen hasten denean itzali sua.

4. Hozten utzi eta eskuz oratu.

5. Zatitu orea nahi beste multzotan. Kolore bakoitzarentzat zati bat. Sartu zati bakoitza edukiontzi batean.

6. Koloratzaileak gehitu edukiontzia bakoitzean.

7. Nahi bada esentzia olioak gehitu daitezke. Usaina emateko da. Gomendatzen digu tanta bat almendra olio eta tanta bat banilla olio.

Oharrak: Etxean egindako plastilinak hainbat hilabete iraungo du edukiontzi hermetikoetan gordetzen badugu. Lehortzen bada busti eskuak eta oratu. Aldiz, itsaskor jartzen bada gehitu irina.