Quantcast
Guraso.eus

Jolasa, jostailuak eta gehiago

 Itsaso Pagoagak 2011. urtean  egindako lehen kolaborazioa dakargu gaurkoan guraso.eusera

Nire asmoa, gurasoek jolas, jostailu eta eskulan desberdinen inguruan dituzten zalantzak argitzeaz gain, gurasoak haurrekin gehiago jolastera bultzatzea da. Haurrentzako, jolastea ekintza garrantzitsua, osasuntsua eta dibertigarria dela esaten badugu, zergatik ez da izango helduontzako?

    Hauxe izango da nire lehenengo kolaborazioa guraso.com atarian. Nire asmoa, gurasoek jolas, jostailu eta eskulan desberdinen inguruan dituzten zalantzak argitzeaz gain, gurasoak haurrekin gehiago jolastera bultzatzea da. Haurrentzako, jolastea ekintza garrantzitsua, osasuntsua eta dibertigarria dela esaten badugu, zergatik ez da izango helduontzako? Utzi lotsak alde batera, eta atera dezagun barruan dugun haur txikia. Ekin diezaiogun jolasari, ekin diezaiogun gozamenari.
Jolasa, berezko ekintza bat da, ongi pasatzeko helburua duena eta ez dena behartua. Jolasteko batzuetan material batzuk behar izaten ditugu, baina beste askotan gure imajinazioa nahikoa izaten da une gogoangarriak igarotzeko. Jolaserako materialak, mota askotakoak izan daitezke: egunerokotasunean inguruan ditugun edozein material izan daiteke baliagarri. Eta bestela, oso espezifikoak izan daitezkeen jostailuak ere aurki genitzake jolaserako baliabide gisa. Jolasa baina, ez pentsa panpinekin, baloiarekin edota eskalextriarekin aritzea denik. Jolasa, etxerako erosketak egitea izan daiteke. Edota urtebetetzea ospatzeko pastela egitea, norberaren gela txukuntzea… Egunerokotasunean burutzen ditugun ekintza asko eta asko, jolas bilakatu genitzake, ekintza atsegin eta dibertigarriak bilakatuz. Badakit hala ere, gaur egun dugun bizimoduarekin horrelako ekintzak jolas bihurtzea ez dela lan erraza baina aukera izanez gero ez dezagun alperrik galdu.
Atal honetan baina, nire helburua gurasoak eta haurrak elkarrekin jolastera bultzatzea denez, horretarako onena baliabideak eskaintzea dela iruditzen zait. Horrexegatik, aldian-aldian gomendio desberdinak luzatuko dizkizuet sareko leiho txiki honetatik. Jolasak, jostailuak eta eskulanak izango dira gomendatuko ditudanak. Nire asmoa ez da gurasoak jostailu edota baliabideak erostera bultzatzea. Baizik eta etxean ditugun traste, jolas eta beste zenbait materialei jolaserako aterabidea ematea. Beraz, lehenengo ariketa bezala, hona hemen nire proposamena.
Seguruenik gure seme-alabek, jostailu dezente izango dituzte eta horietako asko jada ez dituzte erabiliko. Bada, egin dezagun gure seme-alabekin etxean ditugun jolaserako baliabideen inbentarioa. Ikus dezagun elkarrekin, zenbat jostailu ditugun eta horietatik zenbat erabiltzen ditugun. Ariketa hau, aproposa da familia artean egiteko, izan ere sortu daitezkeen elkarrizketak eta hausnarketak interesgarriak izan daitezkeelako. Gainera, ariketa egin ostean, haurrarekin gehien gustatzen zaion jostailuarekin jolastu genezake. Eta ondoren guk geuk erakutsi gure seme-alabari zein zen gure txikitako jolas edo jostailurik gogokoena.
Gurasook ez ezazue horrelako aukerarik galdu. Zuen seme-alabekin berriro, eta une batez ez bada ere, haurrek bezala gozatzeko aukera duzuelako.
Amaitzeko, Euskal Herriko pailazo ezagunek dioten esaldia moldatu dut zuek animatzeko: “Sentitu, pentsatu eta ekin. Jolastu eta gozatu elkarrekin.”

argazkiaren iturria

Itsaso Pagoaga

Kaixo denoi, Haur Hezkuntzako ikasketak egin izanagatik ez naiz irakasle. Aspalditik gehiago interesatu zait hezkuntza ez formaleko esparrua (eskolaz kanpokoa), hezkuntza formala baino. Jolasarekin erlazionatutako gaiak interesatzen zaizkit: jolasak, jostailuak, eskulanak, jolaserako espazioak, jolas ohiturak etab. Jolasteaz gain margotzea, musika ikus-entzutea, zinema eta literatura ere gustuko ditut. Ingurukoek diotenaren arabera, berba zalea eta umoretsua naiz. Guraso.com-eko leiho honetan ere jolasaren inguruan nire hausnarketa, ideia eta proposamenak zuekin partekatzen saiatuko naiz. Eta nola ez, noizean behin jolaserako gonbidapena ere luzatuko dut. Izan ere, ez al dago jolasean ondo pasatzea baino gauza atseginagorik? Itsaso Pagoaga Zaloña (Arrasate, 1985)

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.

loading