Herri eta hiriak haurrenak ere badirela aldarrikatzeko sortu zuen Txatxilipurdi elkarteak kalekantoi jolas bilduma. Bertatik ekarri dugu jolas proposamen hau. Kalekolore
Jolasaren azalpena:
Koloretsua den leku bat aukeratu behar dugu (horma-irudiak, kartelak, pegatinak, landareak, objektuak …) guk dauzkagun gauza koloretsuak ere kokatu ditzakegu inguruan.
Gutariko batek kolore bat eta gorputz atal bat oihukatuko ditu “eskumako belauna gorrian” eta guztiok gorputz atal hau kolore horretan kokatuko dugu korrika.
Azkena egiten duenak edo ez duenak aurkitzen botako du hurrengo betebeharra. “Ezkerreko sorbalda urdina”, hala, ezkerreko sorbalda kolore urdinean jartzera mugituko gara. Kolore hau lekuz mugitu gabe aurkitzen dutenek aurreko betebeharrekin ere jarraitu beharko dute, hau da, eskumako belauna gorrian eta ezkerreko sorbalda urdinean izan beharko dituzte. Mugitu direnek azken agindua bakarrik bete beharko dute (“ezkerreko sorbalda urdina” alegia).
Betebeharra burutzea lortzen duen azkenak botako du berriz oihua. Ahal den heinean, beste pertsona batek izango du betebeharraren ardura eta ahalik eta kolore eta gorputz atal desberdin gehien erabiliko ditugu.
Argazkietan: Oñatiko Txaloka ludotekako haurrekin egin genuen Kalekolore jolasa ludoteka kanpoko jolas parkean. Ondo pasa genuen!!
Argazkiak:
1-jolaserako prest
2-belarria gorria
3-Mingaina-berdea
4-burua berdea
5-Belauna Urdina
kalekantoi Egunerokotasunean hainbat egoeretan jolasteko jolasak batzen dituen bilduma da . Jolasak norberaren edo lagun taldearen gustura eta imajinaziora moldatzeko sortuak izan dira. Baita, espazio ezberdinek ematen dizkiguten aukera eta materialetara ere.
Herri eta hiriak haurrenak ere badirela aldarrikatzeko sortu zuen Txatxilipurdi elkarteak. Horregatik bultzatu nahi izan dituzte haurrak kalea bere egitera eta berain kasa bertan jolastera, Kale kantoiren hartzaile natural eta jolasaren protagonista izanik. Era berean, jolasaren indar sozializatzailea eta hezitzailea azpimarratu eta jarduera ludiko eta talde jolasaren bitartez zenbait gaitasun lantzeko baliagarria den tresna ere sortu dute.
Nahiz eta jolasen bilduma hau haurrentzat zuzenduta egon, helduen esku hartzea ere bultzatu nahi dute. Honetarako, irizpide eta aholku sorta ere prestatu dugu batez ere erabilera hezkidetzailea sustatu nahian.
Hezkidetza zergatik? Hain ohikoak diren sailkapen sexistak ekidin eta neska zein mutil izan jolasteko aukera guztiak eskainiz, haurrek euren identitate eta gaitasun sozialak askatasunean eraikitzeko besteak beste.
Hemen aurkitu dezkazu kalekantoiko hezkidetza gida.
Liburuxka honek, guztira 41 jolas biltzen ditu, haurren egunerokotasunean oinarritutako 6 multzotan banatuak:
– Bidejolasean: etxetik eskolara bidean jolastekoak.
– Gora jaixak: herrietako jaiak dituzte iturri.
– Helduak poteoan ari dira: helduen poteo aspergarrietan umeek ere gozatu dezaten.
– Eta orain bazkaria: bazkari amaigabeetan jolastekoak.
– Bizi bete kalea!: kaleko izkina edo txoko ezberdinetara moldatutakoak.
– Amalurra ere gure lagun: naturak oparitzen dizkigun jolasak.
Iruzkinik ez "Jolas proposamena: Kalekolore"