Quantcast
Guraso.eus

Jazarpena, gero eta presenteago

Honela hitz egin du Iker Ugal Eguillorrek Berrian Levantate Contra el Bullying taldeko eledunak
Jazarpena gure artean egon da ezaguera dugunetik. Harreman sozialak izan, taldeak osatu eta ikuspegiak elkarrekin trukatu nahi dituen espezie batekoak gara. Halako jokamoldeak bide eman diezaioke besteenganako nagusitasun sentimenduari, eta, kasu askotan, baita jazarpenari ere.

Asko dira jazarpen hitza berekin dakarten ekintzak: zerbaitetara hertsatzeak, adibidez. Bortizkeriazko ekintzak dira. Bestalde, bada gizarte bazterkeria ere, zeinaren bidez norbait bakartu egiten baita, azkenean taldetik erabat desagerrarazteraino.

Jazarpena formatuz joaten da; ez da agertzen gauetik goizera. Hasieran, larderia, irain, ezizen kaltegarri eta erasoak izaten dira, sailean. Halako ekintzak behin eta berriro errepikatzen dira; are, areagotu egiten dira, bide ematen baitiote jazarriarenganako nagusitasun sentimenduari. Pixkanaka, egoeraren kontrol erabatekoa hartuko du jazarleak, eta ondorio larriak eragingo dizkio pertsona jazarriari; kasu askotan, baita bere buruaz beste eginarazteraino ere.

Jazarpena ez dago ikastetxeetan bakarrik, baita kirol, antzerki, dantza talde eta abarretan ere; alegia, eguneroko bizimoduko edozein arlotan.

Nola antzeman daiteke norbait jazarria den?

Askotariko zantzuak nabari ohi zaizkie. Aldartea aldatzen zaie: erresuminduago egoten dira, eta etxean husten dute amorru guztia. Jangartxu bihurtzen dira, eta eskolan errendimendu txikiagoa izaten dute. Atzamarkadak eta kolpe arrastoak ageri ohi dituzte, eta ez dute ikastetxera joan nahi izaten; besteak beste, «tripako mina» dutelako aitzakian.

Garrantzitsua da, halaber, jakitea bereizten jazarpena eta unean uneko borroka bat. Gazteek, aldian-aldian, liskarrak izaten dituzte elkarren artean, baina sekula ez da gutxietsi behar jazarpenaren aukera, eta erne egon behar da zer erreakzio datorren.

Gure nahia da pertsona oro erne egotea gazteren baten edozein jarrera deigarri dela-eta, jazarria delako adierazgarri izan baitaiteke.

Gu gazte elkarte bat gara, Iruñean suizidio sail batzuk gertatu eta gero sortua; ikusi genuelarik ez zegoela ganorazko ezer arazo horri aurre egiteko, hainbat pertsona bildu ginen, eta Levántate Contra El Bullying sortzea erabaki genuen.

Gure asmoa da, besteak beste, bitartekari aritzea pertsona jazarriaren eta haren familiaren artean, babesa ematea, eta irakasleak eta zuzendaritza kontzientziatzea, guztiak ere egoeraz jabearaziz gaitz kaltegarri hori behingoz amai dezagun.

Bi kabinete ditugu: bata juridikoa eta bestea emozionala. Eskarmentu eta prestakuntza handiko zenbait pertsonak osatzen dituzte bi kabineteak, eta horiek aholku ematen digute kasuan-kasuan zer konponbide hartu.

Hainbat jarduera egiten ditugu gazteekin; jazarpenaren biktima dira gazte horietako batzuk. Gure asmoa da haiek hobetzea beren buruarekiko estimua eta konfiantza, elkarren artean erlazionatuz eta esperientziak partekatuz.

Dagoeneko, eskolako 30 bullying edo jazarpen kasu iritsi zaizkigu, baina askoz ere gehiago izango dira ezkutuan gordeak; beraz, hezkuntza zentroak kontzientziatu nahi ditugu, hainbat bide baliaturik ezinago erne jar daitezen eta beren gain har dezaten arazo honekiko erantzukizuna.

Hau ez da joko bat, errealitatea baizik.

(Berriako Erredakzioan itzulitako testua)

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.

loading