Ikus-entzunezkoen kontsumoa nerabezaroan

Amaia Pavon (Arrasate, 1984)ikus-entzunezkoen komunikazioan aditua da, eta doktore-tesia egiten ari da nerabeen eta lagun taldeen ikus-entzunezko kontsumo ohituren inguruan. Unibertsitate.net atarian irakurri diogu nerabeek ikus-entzunezkoak kontsumitzea nahi bada, gazteentzako propio sortutako produktuak ekoitzi behar direla, eta Pavonek uste du, gaur gaurkoz, ez dela horrelakorik existitzen.
Pavonen doktore-tesiaren helburuak bi dira: digitalizazioaren garaian nerabeen kontsumo ohiturak zeintzuk diren ikertzea, eta Gipuzkoako nerabeen audientzia-profila nolakoa den aztertzea, lagun-taldearen eta ikus-entzunezkoen artean sortzen diren interakzioan arreta berezia ipiniz. “Ikus-entzunezkoak eguneroko bizitzaren parte dira”, dio Pavonek. “Telesailak jarraitzen dute produktu izarra izaten (…) Digitalizazioaren eta sare sozialen aroan, oraindik ere, nahiago dute telebistan eta familian ikusi ikus-entzunezkoak”. Produktu horietan nerabeek eta gazteek haien erreferente sozialak bilatzen dituztela dio Pavonek. “Musikak eta horren inguruan sortutako ikus-entzunezkoek ere berebiziko garrantzia dute nerabezaroan, eta bertan agertzen diren pertsonaiak, estiloak, janzkerak eta esaerak, hala nola partekatzen dituzten taldea, identitate horren eraikuntzarako”.

Euskarazko ekoizpena

Gaztelerazko produktuak gehiago kontsumitzen dituzte gazteek, eta horren aurrean ere galdetu diote Pavoni Unibertsitatea.net atarikoek. Arrasatearrak ondorengo gogoeta egin du: “Alderatzen badugu kuantitatiboki zenbat produktu ekoizten diren euskaraz eta zenbat gaztelaniaz horrek berak ezartzen du langa (…) Gazteak euskarazko ikus-entzunezkoei begira jarri nahi baditugu, sortu beharko dugu haientzat propio egindako produkturen bat euskaraz, eta gaur gaurkoz ez da horrelakorik existitzen”.

Albistearen eta argazkiaren iturria hemen.