Gaur egun eta betidanik haurrengan jostailuek duten garrantzia azpimarratzen dute adituek. Jolaserako tresna/bitartekoa da jostailua. Txikitatik naturalki denok erabili izan ditugun eta erabiltzen ditugun tresnak dira: komunikatzeko, elkar ezagutzeko, ikasteko, harremanak egiteko, hizkuntza ezberdinak ikasi eta praktikatzeko… Eta batez ere txikiak garenean erabiltzen ditugun arren, heldu edo nagusitzen garenean, aukera gutxiago izanik (denbora ezak edo sarri lotsak eraginez), jostailuak oraindik ere gure parte sentitzen ditugu eta une atseginak pasatzeko edo egunerokotasunetik irteteko erabiltzen ditugu. Orokorrean momentu onak pasa arazten dizkigute baina momentu txarrak kanporatzeko ere oso lagungarriak dira.
Jostailuaren funtzioa beraz, pertsonaren garapenean, gaitasun psikologiko zein fisiologikoen garapenean lagungarri izatea da. Jostailuen bidez haurrek esploratu, aurkitu, ikasi eta objektu desberdinekin elkar eragiten dute. Orokorrean jostailuak jolasa du helburu, formazio eta ikaskuntza prozesuan duen eragina albo batera utzi gabe. Jostailuak, garapen intelektual, psikologiko, sentsorio – motriz, sozial eta emozionalean estimulatzaile gisa duen papera ukaezina da.
Jolasa oinarri dituzten aisialdi taldeentzat, hezkuntza ez formalean lanean dabiltzan elkarteentzat edo jolastea gustuko duten familientzat, mahai jolasak izaten dira jolaserako aukera erabilienetakoak. Tamalez, gaur egun merkatuan dauden mahai jolas gehienak ez daude euskaratuta eta argibideak erdarazkoak dira.
2015-2016 ikasturtean Olgeta, Txatxilipurdi eta Goiena komunikazio taldearen arteko elkarlanarekin sortutako eta Gipuzkoako Foru Aldundiak diruz lagundutako bideo sorta argitaratu genuen.
Bideo hauen helburua aipatu dugun hutsune hau betetzea izan zen; hezitzaileak eta aproposak diren jolasak gomendatzeaz gain, hauekin dugun harremana euskaraz izatea ahalbidetzea, azalpen guztiak eta jolasaren nondik norakoan euskaraz aurkeztuz.
2016-2017 ikasturtean ere elkarlan honekin jarraituko dugu, 15 egunean behi jolas edo jostailu proposamen bat egingo dugu, argibide guztiak euskaraz eta kalitatez eskainiz.
Iruzkin 1 "Ikasturte honetan ere jolas gomendioak Guraso.eus egitasmoan"