Quantcast
Guraso.eus

Hogei urte bete ditu Oñatiko Natur Eskolak

Naturaz ikasteko, gozatzeko eta disfrutatzeko aukera eskaini du bi hamarkadaz.

Captura de pantalla 2015-01-12 a las 13.02.59

Aurtengoa, irailean hasi zutena, 20. ikasturtea dute. 1993an erein zuten Natur Eskolaren hazia, urte hartan inauguratu zuten. Ordutik hona dihardu bertan lanean Jon Betanzosek. Harekin batera dihardute lanean Idoia Bollarrek, Imanol Biainek eta Maite Murgiondok.

Urteetako ureztatze lanak eman ditu fruituak. Egun, programa zabala eskaintzen dute eta urtero 4.500 ikasle pasatzen dira bertatik. “Kopuru horretan mantentzen gara, gure kapazitatea horra mugatzen delako”. Hala ere, Betanzosek zehazten du antolatzen dituzten bestelako ekintza eta irteerek ematen dutela jende gehiago erakartzeko aukera; esaterako, Ingurumen Asteak.

Hasiera batean eskaintzen zituzten tailerrak ziren: ogia egitea, habia-kutxak eraikitzea, papera birziklatzea… Horretaz gain, Arantzazun eta Murgian egiten zituzten ibilaldiak ikasleekin. “Egun, horiez gain, beste asko ditugu. Ikastetxeetako programara ere egokitzen gara”, dio Natur Eskolako arduradunak. Irteeretan ere eskaintza zabalagoa dute. Gaztetxoenekin baserri ingurua ezagutzera joaten dira, adibidez. Helduagoekin, Gesaltzara geologia bertatik bertara aztertzera joaten dira edo Orkatzategira hegazti kolonia ikustera.

Animalien bilduma handia ere badute, gehienak disekatuak eta gutxi batzuk bizirik (arrainak eta muskerrak). “Arantzazuko fraideek emandakoak dira gehienak, baina partikularrek ere ekarri dizkigute. Horretaz gain, Pago-Usok oso bilduma ederra zuen eta Elkar Heziren esku utzi zuen. Ikastetxeak geuri eman digu”. Betanzosek zehaztu du Oñatikoez gain, asko direla kanpotik etortzen direnak. Nola ez, bailaratik, baina baita Gipuzkoako beste herri batzuetatik, Bizkaitik eta Arabatik. Nafarroatik ere etorri izan da talderen bat edo beste, eta gogoan du Iparraldetik ere etorri zirela behin.

Guztiok ureztatu beharrekoa

Ingurumen arazoak ezagutzen, aztertzen eta horiei konponbidea ematen ahalegintzen dira Natur Eskolan. “Ezin diogu guztiari irtenbidea bilatu, baina sentsibilizazio bat gara dezakegu eta horretan saiatzen gara”. Betanzosek dio, baina, horretan beharrezkoa dela guztion esfortzua. “Umeak nagusien isla dira. Ingurumen hezkuntza ez da haurrek bakarrik landu beharrekoa; guztiok zaindu beharreko zerbait da natura. Familian eta eskolan gaia txertatzea ere oso garrantzitsua dela uste dugu, gure eskaintza osagarria da. Denon artean egin beharreko zerbait da”.

Artikuluaren eta argazkiaren iturria: Goiena