Quantcast
Guraso.eus

Gabonak, etxea, denbora… Jostailuak sortzera!

Itsaso Pagoagak 2013.urtean idatzi zuen kolaborazioa

Gabonak joan dira eta berarekin batera, etxeetako oturuntzak, familiakoekin egindako hitz aspertu amaiezinak eta opariak. Nola ez, opariak dira sasoi honetako protagonista nagusiak, kontsumo (kontsumismo) gizarte honetan. Gabonetako oparien artean denetarik aurkitu dugu, lurrinak, zapiak, teknologia berrietako aparailuak eta nola ez, etxeko txikienentzako jostailuak.

Gatazka iturri izan ohi da etxe askotan, haurrei oparitutako jostailuak. Izan ere, zenbait kasutan, gehienetan ez esatearren, opari gehiegi egiten dizkiegu haurrei sasoi honetan. Familiako kide guztiek nahi dute bere oparia egin etxeko txikiari. Modu horretan, agian, haurrarekin egoterik ez daukagun denbora konpentsatu nahian edo.

Jai hauek iritsi aurretik hainbat gurasorekin aritu naiz gaiaren bueltan solasean. Eta denek gauza antzerakoa diote, gatazka iturri izaten dela oparien gaia beraien etxeetan. Baina oso zaila zaiela egoera horri buelta ematea eta beraien erabakiei tinko eustea. Izan ere, aitona-amonak, izeba-osabak temoso jartzen ei dira eta ez ei dute nahi, oparirik egin ezean, besteak baino gutxiago sentitu. Edo ez ei dute nahi izaten, oparirik egin ez dutelako, haurrek maite ez dutela sentiaraztea. Ai ama, nolako usteak izaten ditugun buruan bueltaka…

Horrelako egoerak kudeatzea ez da erraza, aitortzen dut. Baina badirudi sasoi honetan, gurasoen autoritatearen gainetik daudela familiako gainontzeko kideen erabakiak opariei dagokionez. Beraz, hona hemen nire gomendioa: gabonetan etxeko txikienei oparia egiteko asmoa izanez gero, lehenengo gurasoei jakinarazi, galdetu zer behar duen haurrak eta bi, ahal izanez gero, eta familiako kide batek baino gehiagok oparia egiteko asmoa izanez gero, adostasunera eta sinplifikaziora heltzeko bideak bilatu. Hobe da, opari asko egin baino, gutxi eta ongi aukeratutakoak egitea. Sarri ikusi izan baitut, gabonetako bazkarien ostean jostailuekin jolasean ibili beharrean, jostailuaren bilgarriarekin jolasean dabiltzan haurrak.

Artikulua idazteko sarean kuxkuxean nenbilela aspaldi ikusitako bideo honetaz gogoratu naiz. Eta zuekin partekatzea otu zait, izan ere, sarri objektu sinpleak edota egunerokotasunean eskura ditugunak dira, jolaserako eta gure sormena dantzan jartzeko jostailurik aproposenak.
Gabonetako opari ugarien gaiaz gain, baina, gaurkoan bestelako gai baten inguruan jardun nahiko nuke: baliabide naturalez edota etxean egindako jostailuak. Izan ere, askotan edo sarri uste dugu, haur bati jostailu bat eskaintzeko, jostailu dendara joan eta bertan erosi beharra daukagula. Bada ez, badira, erosteaz gain beste aukera batzuk, eta horien artean, osoena nire ustez, jostailuak etxean egitea da. Osoena diot, gure sormena lantzeaz gain, norberak egindakoak sortzen duen plazera, ezin delako erositako objektuarekin ordezkatu.

Jostailuak etxean egiteko baina, baditugu zenbait eragozpen: jostailua egiteko gai izango ote garenaren zalantzak, denbora eza, baliabide eza, ideia eza…. Horietako batzuei erantzutea errazagoa da beste batzuei baino. Izan ere denboraren kontua, norberaren antolaketan datza gehienbat (dena dela neguan, udan baino denbora gehiago pasatzen dugu etxea barruan, beraz, aprobetxatu!), baina baliabide ezaren kontua, aise konpondu daiteke. Eta horretarako, hona hemen, nire ekarpena. Azkenaldian etxean egiteko jostailuei buruzko irakurri ditudan liburuak zuekin partekatzea.

00106514925079____1__1000x1000

Batetik, Christine Armengaud, frantsesak idatzitako “Juguetes de la naturaleza. Historia y secretos para fabricarlos”. Liburu honetan, baliabide natural hutsez egindako jostailu eta musika instrumentuei buruzko azalpen zehatzak datoz, argazki eta marrazkiz hornituta. Gainera, bakoitza zein sasoitan egin daitekeen ere azaltzen du. Izan ere naturak ez dauka stock-ik, jostailu dendek bezalaxe.

00106532661250___1_1000x1000Bestetik, Christopher Clouder eta Janni Nicol autoreek idatzitako “Juegos creativos para tu bebe” izeneko liburua aipatzea gustatuko litzaidake. Liburu honetan, etxeko txikienentzat (batez ere 0-2 urte bitarteko haurrentzat) egin genitzakeen jostailuei buruzko informazioa eta azalpena azaltzen da. Oso jostailu goxoak eta material sinplekoak azaltzen dira bertan, oihal, artile edota egurrezko jostailuak, alegia. Eskerrak eman nahi dizkiot Maierri, liburu zoragarri hau nirekin partekatzearren. Mila esker!

Itsaso Pagoaga

Kaixo denoi, Haur Hezkuntzako ikasketak egin izanagatik ez naiz irakasle. Aspalditik gehiago interesatu zait hezkuntza ez formaleko esparrua (eskolaz kanpokoa), hezkuntza formala baino. Jolasarekin erlazionatutako gaiak interesatzen zaizkit: jolasak, jostailuak, eskulanak, jolaserako espazioak, jolas ohiturak etab. Jolasteaz gain margotzea, musika ikus-entzutea, zinema eta literatura ere gustuko ditut. Ingurukoek diotenaren arabera, berba zalea eta umoretsua naiz. Guraso.com-eko leiho honetan ere jolasaren inguruan nire hausnarketa, ideia eta proposamenak zuekin partekatzen saiatuko naiz. Eta nola ez, noizean behin jolaserako gonbidapena ere luzatuko dut. Izan ere, ez al dago jolasean ondo pasatzea baino gauza atseginagorik? Itsaso Pagoaga Zaloña (Arrasate, 1985)

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.

loading