Quantcast
Guraso.eus

Gabon hauetan, etxerako oparien zerrenda.

Gabonak ate joka ditugu eta etxe askotan nahikoa lan dugu etxeko txikientzako opariak aukeratzen. Bada, gaurko artikulu honetan etxerako eta bide batez, etxean bizi garen familiako kide guztientzako nire oparien zerrenda partekatu nahi dut zuekin. Ea zer iruditzen zaizuen. Bestelako gomendio edo proposamenik izan ezkero, partekatu zeuena. Bide batez, jolasean gustura amaitu/hasi urtea.

Nire aurtengo etxerako oparien zerrenda bi liburuk osatzen dute. Beste urte batzuetan etxerako jostailu edo mahai jolas bat aukeratu izan dut. Mahai jolasa aukeratzea ideia egokia iruditu izan zait etxeko txiki zein nagusiekin jolas momentu atsegin bat partekatzeko. Baina aurtengoan liburu hauek deskubritu ditut eta zuekin partekatzeko gogoa izan dut. Uste dut aukera onak izan daitezkeela jolas momentu atsegin eta osasuntsuak igarotzeko.

Lehenak honelaxe du izenburua: “El libro de los palos” Grapat etxeko Casianak gomendatu zidan, gazteleraz argitaratua da eta ikaragarria iruditu zait. Liburuaren portadak honelaxe dio: makilekin eraki eta egiteko 11 gauza. Eta halaxe da, makila bat gure sormenak izan nahi duen hori izan daiteke. Jolaserako, eraikitzeko, sortzeko, apurtzeko, elkarrekin jolasteko, eskulanetarako…baliabide itzela dira makilak. Heike Freirek idatzi eta Txatxilipurdiko lagunek euskaratutako Berdean Hezi liburuan azaltzen den bezala, pertsonok eta bereziki haurrek, gero eta hartu eman gutxiago dugu naturarekin. Bada, liburu hau aitzaki edarra izan daiteke naturara gerturatu eta jolas aukerak sortu eta gauzatzeko. Berez, ez dugu liburu honen beharrik izango gure sormen gaitasuna eta haurrena, itzela baita. Baina ideia faltan baldin bazaudete hona hemen ideia sorta eder bat.  Jo Schofield eta Fiona Danks egileek makilekin hamaika abentura, eskulan, jolas sortzaile eta fantasiazko jolasak proposatzen dizkigute irudi ederrez hornitutako liburu honetan. Betiere ingurunearekiko errespetuz eta maitasunez jokatuz. Eta haurrei beraien kabuz aire librean jolasteko esperientzia eskainiz, beraien muga, arrisku eta aukerez jabetu eta gaitasunetan trebatu daitezen.

el-libro-de-la-ciudad-silvestre-reducidoLiburu honetatik abitatuta argitaletxe berdinak beste bi liburu interesgarri dituela konturatu naiz sarean. Oraindik ez ditut ezagutzen baina itxura ona dute eta interesa izan ezkero, hona hemen beraien izenak: “El libro del mal tiempo: un montón de cosas que hacer al aire libre con lluvia, viento y nieve” eta “ El libro de la ciudad silvestre: un montón de cosas que hacer en la ciudad y en el pueblo”.
Bigarren liburu gomendioa ingelesez da baina aurrekoa bezain interesgarria da. “Play the forest school way: woodland games, crafts and skills for adventurous kids”. Peter Houghton eta Jane Worroll dira autoreak eta beraien hitzetan hau da haurren baso dibertsiorako liburua. Baso eskolak haurraren konfiantza eta autoestimua aire libreko jolas eta ikaskuntza ikaste-irakaste prozesuan oinarritzen duen filosofia da. Liburu honek basora edo herriko parkera irten eta bertako natur elementuekin elkarrekintzan aritzera gonbidatzen gaitu, pantailen aurrean egon beharrean. Poliki-poliki eta horrelako jolasen bidez naturaz gozatzea eta aire libreko jolasa maitatzea da helburua. Nazioartean basoko jolasak eta eskulanak batzen dituen lehen liburua da berau eta bertan azaltzen diren proposamenei esker, hamaika gaitasun jarri genitzake martxan lagun zein familiartean. Aurreko liburuak ez bezala, argazkien ordez, azalpenak ilustrazio eder, magiko eta sinpleez hornituta dago liburua.  Eta haurrek aise ulertu ahal izango dituzte.

playing-the-forest-school-way-woodland-games-and-crafts-for-9781780289298_hr
Pena da momentuz horrelako libururik euskaraz ez izatea. Agian urte berrirako proposamenen zerrendaren batean, era honetako liburu bat euskaraz argitaratzea agertuko da. Nor daki!

Itsaso Pagoaga

Kaixo denoi, Haur Hezkuntzako ikasketak egin izanagatik ez naiz irakasle. Aspalditik gehiago interesatu zait hezkuntza ez formaleko esparrua (eskolaz kanpokoa), hezkuntza formala baino. Jolasarekin erlazionatutako gaiak interesatzen zaizkit: jolasak, jostailuak, eskulanak, jolaserako espazioak, jolas ohiturak etab. Jolasteaz gain margotzea, musika ikus-entzutea, zinema eta literatura ere gustuko ditut. Ingurukoek diotenaren arabera, berba zalea eta umoretsua naiz. Guraso.com-eko leiho honetan ere jolasaren inguruan nire hausnarketa, ideia eta proposamenak zuekin partekatzen saiatuko naiz. Eta nola ez, noizean behin jolaserako gonbidapena ere luzatuko dut. Izan ere, ez al dago jolasean ondo pasatzea baino gauza atseginagorik? Itsaso Pagoaga Zaloña (Arrasate, 1985)

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading