Euskararen erabilera areagotzeko irizpide bila, Elgoibarren
Azaroaren 28an egingo dute hizkuntza-ohituretan eragiteko estrategia argiak finkatzeko helburuarekin.
Euskararen ezagutzaren eta erabileraren artean desoreka handia dagoela jabetuta, Elgoibarko Izarra euskara elkarteak bost orduko jardunaldia antolatu du azaroaren 28rako. Helburua da haurren eta nerabeen euskararen erabilera areagotzeko klabeak aztertzea, eta hizkuntza-ohituretan eragiteko estrategia argiak finkatzea.
Elgoibarko Udalaren eta herriko hainbat eragileren laguntzarekin Euskal Herri mailako adituak izango dira jardunaldian: Kike Amonarriz, Iñaki Eizmendi, Koikili Lertxundi, Jose Mari Agirretxe Porrotx, Lorea Agirre, Iñaki Arruti, Naiara Martin…
Jardunaldian eskola orduz kanpoko jardueretan zentratuko dira, eta haurrekin eta nerabeekin lotura zuzena duten sektoreak hartuko dituzte aintzat; kirola, aisialdia, familia, Udala… Sektore bakoitzari aditu batek helduko dio.
Izenematea zabalik
Jardunaldia ez dute soilik adituendako edo teknikariendako prestatu. Haurrekin eta nerabeekin harremanetan dauden agente eta eragile guztiak daude bertan parte hartzera gonbidatuta. Jardunaldia 09:00etatik 14:00etara egingo dute Elgoibarko IMH ikastetxean. Izenematea zabalik dute azaroaren 17ra arte.