Quantcast
Guraso.eus

Euskadiko orkestra sinfonikoaren ‘Musika Familian’ kontzertuak hastear

Mozart, Nannerl eta Lagunak ikuskizuna izango da ikasturte berriko lehenengoa, eta hilaren 19an estreinatuko dute Miramonen. Mozart eta haren arreba Nannerl izango ditu protagonista.

Bi protagonista nagusi izango ditu kontzertu honek: musika klasikoaren pertsonaia entzutetsuenetako bat, Wolfgang Amadeus Mozart, eta bere arreba Maria Anna Mozart. Hura ere konpositorea, baina zeinaren obra gehienak galdu egin diren historian barrena. “Nannerl —Maria Annaren goitizena— berpiztu egingo da gure aurrean ezagutzera emateko eta gu bere anaiaren musikara hurbiltzeko. Martxa turkiarraren erritmora eta bere obrak musika-estilo ezberdinen bidez eraldatzeko jolasekin, haurrek ikusiko dute Mozarten musika gaurkotasun osokoa dela”, adierazi du programako arduradunek.

Musika Familian ataleko lehen kontzertua izango da. 2 eta 5 urte arteko neska-mutikoei zuzendutako ikuskizuna da eta bi kontzertu izango dira hilaren 19an, bata 11:00etan eta bestea 12:30ean, eta biak euskaraz.

Musikariak izango dira Laura Balboa (biolina), Nathalie Dabadie (biolina), Justyna Janiak-Krymer (biola), Jon Larraz (biolontxeloa) eta Sara Zufiaurre (klarinetea), eta Pedro José Rodriguez (pianoa). Obraren aurkezlea Ana Eguiazabal izango da eta lanaren gidoia Musika Gelaren koordinatzaile Mikel Cañadak sortu du.
 
Denboraldia berriaren ezaugarriak

 
Musika Gela zikloaren denboraldi berria adin guztietako publikoari zuzendutako dago eta askotariko proposamenez beteta dator. Mozart, Nannerl eta Lagunak ikuskizunarekin batera zikloak 6 eta 16 urte bitarteko gaztetxoentzat pentsatutako proposamen gehiago ere izango ditu.

Zikloaren programazio osoari buruzko xehetasunak urri erdi aldera emango dira ezagutzera.

Albistearen eta argazkiaren iturria: Euskadiko orkestra sinfonikoa.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude