Quantcast
Guraso.eus

Etxeko lanak bai? Ez? Noiz? Zenbat? Nola?

Argia astekariak azalera ekarri zuen azaroaren 8an etxeko lanen gaia, beste behin ere eztabaida aurkeztu zaigu mahai gainean. Etxeko lanak bai? Zenbat?, Noiztik hasita? Zertarako?

Ikerketak egin dira, Euskal Herrian egindako nabarmenena Joxe Amiamak egin du eta 2013.urte amaieran publikatu zuen. Hik hasi aldizkarian ere artikulu zabala eskaini zioten Amiamaren tesiari eta tesia aurkezteaz gain etxeko lanen baliagarritasunaz, gurasoek duten rolaz, etxean sortzen duten estresaz idatzi zuten.

Europako beste herrialde batzuetan gaia nola bideratzen duten ezagutzea ere interesgarria izan daiteke, baita herrialde ezberdinetan sortzen diren eztabaidak ezagutzea ere. 2012. Urtean, adibidez,hamabost egunez eskolatik bidalitako etxeko lanei muzin egitera, grebara deitu zuen Frantziako Estatuko guraso elkarte handienak, Ikasleen Gurasoen Kontseilu Federazioak (FCPE).

Eztabaida ez da hemengoa bakarrik, beraz. Beste herrialde batzuetan gaia nola lantzen zuten ere aztertu zuen aurretik aipatu dugun ikerketan, Joxe Amiamak:

“Danimarkak ez dauka berariazko araudirik, baina hainbat debeku orokor ditu; besteak beste, debekaturik dago asteburuetan etxerako lanak agintzea. Erresuma Batuan hainbat arau ezarrita daude Lehen eta Bigarren Hezkuntzan: familiaren eta eskolaren artean adostasuna bilatu behar da, adibidez, eta zentroak alor horretan jarraitu beharreko politiken inguruko jarraibideak daude, familientzako lagungarri; eta prestatzeko balio dezaketen esku-orriak dituzte, eta eguneko denborak mugatuta daude: lehen eta bigarren mailan, 12 minutu; 3. eta 4. mailan, 18 minutu; 5. eta 6. mailan, 30 minutu; 7 eta 8. mailan, 45 minututik 90era, eta aurrerago, bi ordura arte.”

Zihara Embeitak bere blogean idatzi zuen artikuluaren izenburuak argi erakusten du bere iritzia, “etxeko lanik, ez eskerrik asko”. Artikulua lotura interesgarri asko eskaini zizkigun; hala nola, alabak “haurtzaro pozgarria izan zezan eta egunero 10 ordu lo egin zezan” etxeko lanen zati bat egiten zuela aitortu du Alfonso González Balanza irakaslearen testigantza, edo Udarako etxeko lan bitxiak bidaltzeagatik ezagun egin zen Cesare Cata irakasle italiarraren metodologia.

Kontrarako etxeko lanak ere ezagutu ditugu, hau da, familia batek eskolako irakasleari udan familianlandutako esparruak indartzeko eskolan egin beharrekoak bidaltzea.

Joxe Amiama pedagogoa, Lurdes Imaz EHIGE eskola publikoetako guraso elkartekoa, Aitor Etxarte Nafarroako eskola kontseiluko presidentea, Iñaki Larrea Mondragon Unibertsitateko pedagoago eta Bego Gordillo Lekeitiko Azkue ikastolako psikologoarekin hitzegin zuten faktoria saioan. Bideo hau oinarri hartu zuten elkarrizketarako

Guk, Guraso.eus-en gurasoen esperientziak jaso nahi ditugu, gure etxeetan etxeko lanak nola bizi ditugu ezagutu nahi dugu. Haurrekin batera intereseko gaiak jorratzeko aitzakia dira? Edo lan karga estresagarri? Nola bizi ditugu etxerako lanak?

argazkiarien iturria

 

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.

loading