Quantcast
Guraso.eus

Entzutea: belarria jartzea ez da nahikoa!!!

Aurreko artikuluan guraso eta seme-alaben arteko harremanean komunikazio moduek duten garrantziaz aritu ginen. Gaian sakondu asmoz, oraingoan, komunikazioa hobetzen lagunduko diguten ariketa bat proposatuko dizugu.

Komunikazioan bi jarduera nagusi ematen dira: ENTZUTEA eta ADIERAZTEA.
Zenon de Citión-ek esandakoa gogoratuz, “Bi belarri eta aho bakarra daukagu, gutxiago hitz egin eta gehiago entzuteko”. Nolabait, entzuteak duen garrantzia azpimarratu nahi zuen esaldi honetan. Gaurko helburua, beraz, aktiboki entzuten ikastea da. Baina, zer da aktiboki entzutea?
Komunikazioari buruzko artikuluan argitzen genuen, egoera komunikatiboan hitzak duen garrantzia miniñoa dela ( %10 bakarrik), ahots tonua eta gorputz adierazpenen (aurpegiaren keinua, posturak..) bidez komunikatzen dela gehien bat (%90). Beraz, besteak esaten duena entzuteko, hau da, mezua ondo jasotzeko, ez da soilik belarria jarri behar, begiak, bihotza eta burua ere prest izan behar ditugu. Azken finean, entzutea, gure gorputz oso inplikatzen duen JARRERA bat da.

02b-escuchar
Nola egiten da hori?
•    Gure pentsamendua geldiarazi eta gure gorputza lasaitu. Gure barrenak isiltzea lortzen ez badugu, zaila izango da besteak esaten duena ongi entzutea. Kasu honetan, gure barrenena daramagun zurrunbilo pertsonalak (pentsatzen duguna, sentitzen duguna, uste duguna..) entzumen ariketan interferentziak sortzen dituela esan dezakegu.

•    Interferentzia sortzen duten 3 oztopo nagusien kontrola hartu behar dugu:
•    AURREIRITZIAK: askotan besteak esaten duena zergatik esaten duen badakigula uste dugu. Hau da, entzun bezain pronto klasifikatu dugu betiko poltsan eta ez diogu adierazten ari denari buruzko galderarik egiten. Aurreiritzi hauek kalte handia egiten dute komunikazioan.
•    URDURITASUNA: presaka bizi gara eta askotan ez dugu tono emozional lasaia lortzen egun osoan. Entzun ahal izateko, gorputza lasaitu behar da eta presa/estresa/antsietatea bezalako emozioak alboratu.
•    PENTSAMENDU AZELERATUA: gure pentsamendua ere alde batetik bestera dabil, laneko arazoak, etxekoak, bihar egin beharrekoak, lagun/bikotearekin izandako eztabaida… ideia eta pentsamendu guzti hauek alboratzea komeni da entzun behar duguna atentzioz egiteko.
•    Entzuten ari garena hobeto ulertzeko galdera zabalak egin. “Zer esan nahi duzu? Zergatik esaten duzu hori? Ongi zaude? Zertan lagun zaitzaket? Gogoratzen duzu aurrekoan adostu genuena?…” Galderen bitartez, besteari, berak sentitu eta pentsatzen duena hobeto ulertzen lagunduko diogu, eta bide batez, guri, besteak adierazi nahi duena hobeto jasotzen lagunduko digu.

Arestian aipatutako entzute moduari ENTZUTE AKTIBOA deritzogu. Entzuleak, jarrera pasibotik urrun, modu aktiboan entzuten duelako; bere jarrera aldatzen du eta entzuteko prestatzen du gorputz osoa. Entzute modu honek pertsonen arteko harremanak hobetu eta adiskidetasun sentimendua areagotzen ditu.

ARIKETA PROPOSAMENA

Entzutearen inguruan behar dugun JARRERAn trebatzeko ariketa bat proposatzen dizugu.

•    Lehenik, zuhaitz bat zarela irudikatu. Atentzioa eta pentsamendua zuhaitz horretan jar ezazu eta zuhaitzak duen patxada eta lasaitasun hori lortzen saiatu zaitez. Arnasketa sakonak lagunduko dizu egoera hori lortzen.

•    Ondoren, inguruan duzuna behatu. Behatzen ari zalera, agian, pentsamendu ezberdinak etorriko zaizkizu, ez egin kasurik, ez utzi zure moralari ikusten ari zarena epaitzen… saia zaitez ikusi eta entzuten duzuna besterik gabe disfrutatzen.

•    Minutu bat eskeini jarrera horretan egoteari. Ondoren, egoera komunikatiboetan aplikatzen saiatu.

Itziar Bartolome

Kaixo, Itziar Bartolome Aranburuzabala nauzu (Arrasate, 1973). Hezkuntzaren psikologian, dinamizazio soziokulturalean eta ikaskuntza prozesu zailetan laguntzeko trebatu nintzen. Hala ere, teoria guztietatik haratago, bizipenen bidez ikasten dudan pertsona naizenez, eguneroko jarduna da nire eskolarik esanguratsuena. Naturari ahalik eta errotuen bizitzeko apostua egin dut eta horrek ematen dit oinarrizko bizipoza eta lasaitasuna egunerokoari sormenez eta gogotsu ekiteko. Biziki maite dut izaki guztiengandik gertu sentitzea, eta bereziki, haurrekiko harremanak izan dira, gaur arte, nire ikaskuntza prozesua gehien aberastu dutenak. Euskalgintza, herrigintza eta naturgintzari erabat lotuta dago nire taupada. Hezkuntza ez formalaren eremuan hamaika proiektutan hartu dut parte haur zein heldu jendearekin eta esparru horretan sustraitu naiz gustura. Guraso.com-en aldiro idazten dut “basoa kanpotik ikusten” saiatu eta ikuspegi hori konpartitzeko asmoz. Elkarrengandik asko ikasiko dugulakoan, gero arte eta ondo bizi!

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading