Quantcast
Guraso.eus

Denbora hau oparia izan daiteke

Nahia Alkorta

Zer moduz zaude? Eta etxeko besteak? Asteburu arraroa igarota ematen du gaur hasiko dela serioago itxialdiaren gaia eta etxe askotan antsietateak gora egin duela ematen du. 

Ez dut formula magikorik zure etxeko egoera hobetzeko, hausnarketa batzuk soilik…

Egun hauetan dexentek idatzi didazue haurrek kalera atera behar dutela esanez eta etxeetan gaizki pasatuko dutelaz ziurtatuz… Eta guztiei erantzun antzekoa bidali dizuet. Haurren beharra da edo helduona? Egia da aktiboagoak diren haurrek intentsitate handiagoz biziko dutela egoera hau, baina etxean egiteko milaka baliabide ditugu eskura. Eta ez, ez naiz ari ekintza gidatuen eta ordutegi zurrun eta konplexu baten diseinua egin behar duzula esaten… Alderantziz, agian, zure haurrak beste era batera ezagutzeko aukera zoragarria da. Hizketarako gaitasuna garatu badute beraiekin hitz egin eta beraien irudimena, kezkak, pozak… bide desberdinetatik ezagutzekoa. 

Txikiagoak diren haurrekin lurrean etzan eta mundua euren begietatik ikustekoa… 

Zaharragoak direnekin abenturak eraiki, etxean egin beharreko lanak dibertigarri bizitzea, sukaldea laborategi bihurtzea, bainera edo dutxa submarinoa eta zure txikitako jolasak berreskuratu eta zu haurtzarora itzultzekoa… 

Zure haurrentzat oparia izango da zurekin denbora igarotzea. 

Baina zer gertatzen da helduokin?

Sarri ez dakigula egoten, egiten soilik baizik. 

Eta desikaste hori oso zaila da. Ze haur txikiak behar du egotea, berarekin denbora egotea, azala, kontaktua… behar du 24 orduz egotea… baina helduarentzat zenbat mamu agertzen diren egiten ez garenean ari ez?

Hari, post eta bideo asko biralizatzen ari dira denbora “okupatu” eta gauzak egiteko gomendioekin… eta aldiz, oso gutxi, egoteko gomendioekin. 

Eta bai, denbora “okupatzea” agian eraginkorra izango da une batzuetan baina 15 egunez, 24 orduz eta etxe barruan denbora okupatzeak berak estresa ere sortuko dizu agian…

Egotera gonbidatu nahi zaitut, begietara begiratzea zure gertukoenei, akaso orain urrun sentitzen dituzun horiei, eta zure buruari ere bai. 

Airea behar duzun uneetan zabaldu leihoak ongi, dutxa bat hartu, musika jarri eta gustuko duzun zerbait egin. 

Sarean topatuko dituzu mota guztitako ekintzak estres uneetarako: meditazioa, yoga, etxean kirola egiteko bideoak, jolasak… 

Saiatu bereizten benetan zeinek behar duen airea, saiatu zuen arteko harremanak beste era batera josten…

Beltza ikusten baduzu ere, denbora hau oparia izan daiteke. 

Zure emozioen kargu egin besteei leporatu gabe…

Nahia Alkorta Elezgarai

Nahia Alkorta Elezgarai naiz, Sabeletik Mundura webgunearen atzean dagoen bihotza. Ama-haurren akonpainamenduan, haurdunaldiko eta jaiotzako galeretan, edoskitzean eta soinean eramatean aholkularia. Haurdunaldi aurretik haurrak 3 urte bitarterako haurdun dagoenearen, bikotekidearen eta ingurukoen eta haurtxoaren beharretan espezializatua.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.

loading