Quantcast
Guraso.eus

Adingabeen argazkiak Interneten jartzearen arrisku nagusiak hiru dira

Guraso askok garbi dute: ez dira adingabeen argazkiak sare sozialetan argitaratu behar; are gutxiago, gainera, publiko guztiak ikusteko moduan. Baina beste askok ez dute horrela pentsatzen, eta Facebook-eko profilak seme-alaben edonolako argazkiz betetzen dituzte, izan ditzaketen ondorioez jabetu gabe. Gaiaren inguruan idatzi interesgarria egin du Usoa Agirrek Puntu aldizkarian.

28-29-063

Ohitura horretaz jabeturik, Frantziako poliziak ohartarazpen bat argitaratu zuen, gurasoei gomendatuz ez igotzeko Internetera seme-alaben argazkiak. Ez etorkizunean irudi horiek izan dezaketen eragin sozial edo psikologikoagatik bakarrik, baita pedofiloen eskuetara iritsi daitezkeelako ere.

Gurasoak auzitara

Gurasoen betebeharra da seme-alaben irudia babestea eta publikoki sarean ez erakustea. Frantziako Kode Zibilean esplizituki aipatzen da gurasoak direla seme-alaben irudia babesteko arduradunak. Hala, Frantziako zenbait legelarik uste dute geroz eta seme-alaba gehiagok eramango dituztela gurasoak auzitara, adingabeak zirenean Interneten publikatutako argazkiengatik. Auziak aurrera eginez gero, gurasoek urtebeteko kartzela-zigorra edo 45.000 euroko isuna jaso ahal izango lukete.

Nagusiki hiru arrisku

Frantziako poliziaren aholku horrek eman digu gaia jorratzeko bidea eta zuekin partekatu nahiko nituzke adingabeen argazkiak Internetera igotzeak dituen zenbait arrisku.

Adituen arabera, adingabeen argazkiak Interneten jartzearen arrisku nagusiak hiru dira: batetik, protagonistaren identitatea bereganatzea, norberaren semea edo alaba dela esanez, adibidez; bestetik, Cyberbullying-erako erabiltzea: Internet bidezko jazarpena; hirugarrena, Morphing-erako erabiltzea: argazkiaren manipulazioa, adingabearen aurpegia beste argazki baten gainean jarriz.
Ez dira kasu horiek askotan gertatzen, baina arriskuak hor daude. Helduon argazkiekin ere arriskua berbera da, baina adingabeekin handiagoa da kaltea.

Dena den, artikulu honen helburua ez da umeen argazkiak Internetera ez igotzeko esatea, sarean zabaldu nahi badituzu zenbait aholku ematea baizik. Beste arlo askotan bezala, gure seme-alaben argazkiekin ere zentzuz jokatu beharko genuke eta kontuan hartu, benetan argazkia pribatua bada, ez dela komeni sare sozialetan jartzea. Berdin dio ze pribatutasun maila ezarri duzun Facebook-eko zure profilean, handik edo hemendik publiko egitera irits daiteke eta.
Beraz, adingabeen argazkiak sare sozialetan zabaldu nahi badituzue, ondoko taulan dituzue zenbait aholku.

Aholkuak

1. Ez igo sekula umeak biluzik azaltzen diren argazkiak. Bainatzen dagoen momentua, ipurdi bistan korrika doanean… momentu dibertigarriak izan daitezke, baina badaude horrelako irudiekin bildumak egin eta pornografiarako erabiltzen dituzten munstroak.

2. Ez argitaratu argazkiak egunero. Egoera ahulean jartzen zaitu eta zure zein seme-alabaren segurtasuna arriskuan jartzen duzu.

3. Argazkian ez dadila agertu baliozko objekturik. Etxean egindako argazkiren bat igotzen baduzu, saiatu baliozko gauzarik ez erakusten: telebista, ordenagailua, autoa… Lapurrentzako informazio baliagarria izan daiteke.

4. Ez dadila agertu etxeko helbidea edo atea. Egindako argazkiak leku publikoetakoak izan daitezela, eta, hala ez badira, ez daitezela agertu zure etxea dagoen kalearen izena edo etxeko sarrera, adibidez.

5. Argazkiarekin batera ematen den informazioa zaindu. Hor eman daiteke lapurrentzako informazio baliagarria: “Oporretarako dena prest. Hilabete etxetik kanpo izango gara”, “Eskolatik irteten, egunero bezala”, eta antzerakoak.

6. Errepasatu, denbora batera, igotako argazki eta bildumak. Igo genituen egunean lagunei erakutsi genizkien oporretako argazkiak, adibidez, baina, agian, dagoeneko ez du zentzurik bilduma Interneten edukitzeak. Errepasatu sare sozialetan ditugun argazkiak, eta, orain ez badute zentzurik, ezabatu.

7. Umeak egoera konprometituan agertzen diren argazkiak ez igo. Edo aurpegi barregarriekin agertzen direnak. Meme-ak hainbeste erabiltzen diren garai honetan, ez liguke batere graziarik egingo gure umearen aurpegiarekin mundu guztiak barre egitea.

Aholkuak bukatzeko, aukera ona izan daiteke argazki artistikoak egiten saiatzea: esku bat erakutsi, argiarekin jolastu, maskarak erabili… Sare sozialak eta seme-alabak uztartzeko beste modu bat izan daiteke hori.

Artikuluaren iturria: Puntua aldizkaria.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.

loading