Quantcast
Guraso.eus

ACWY meningokokoaren aurkako ezohiko txertaketa kanpaina martxan da

Osakidetzak ACWY meningokokoaren aurkako txertoa jartzeko ezohiko kanpaina hasi du. Txertoa 2001etik 2007ra bitartean jaiotako eta aurretik C meningokokoaren aurkako txertoa hartutako gazteei jarriko zaie; izan ere, eta azaldu dutenez orain hartuko duten txertoak serotipo gehiago (AWY) hartzen ditu.

Gaixotasun meningokozikoa da meningokoko izenez ezagutzen den bakterioak eragindako infekzioa. Osakidetzatik adierazi dutenez gaixotasun honek oso ondorio larriak eragin ditzake osasunean. “Gaur egun txerto berri bat dago, meningokoko mota gehiagoren aurka babesten duena. Zehazki, A, C, W eta Y-ren aurka. Txerto injektigarria da, eta dosi bakarrean ematen da”.

Ezohiko kanpaina berria 2001 eta 2007 bitartean jaiotako guztiei dago zuzenduta, hori baita gaixotasuna transmititu dezakeen populazio-taldea. “Segur aski, meningokoko C gaitzaren aurka txertatuta egongo dira pertsona horiek, baina orain txerto berri hau jarri behar dute, babes handiagoa bermatzen du-eta”.

Txertaketa pixkanaka egingo dela adierazi dute Osakidetzatik. Hain zuzen ere, hurrengo hiru ikasturteetan: 2019-2020 / 2020-2021 eta 2021/2022.

Ikasturte honetan eta otsailetik aurrera txertoa jasoko dute 2001., 2002. eta 2004. urtean jaiotako guztiek. Ikastetxeetan, lanbide-hezkuntzako zentroetan eta unibertsitateetan jarriko da txertoa. Ikasten ari ez direnek edo ikastetxean txertatzerik ez dutenek aurrez hitzordua eskatuta osasun-zentroan jarri ahal izango dute txertoa.


Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.

loading