Zoru pelbikoa sasoiko daukazu?

Bereziki haurdunaldiarekin lotzen bada ere, ohitura txarren ondorioz, gizon zein emakume, guztiek jasan ditzakete desegokitzapenak zoru pelbikoan. PUNTUA aldizkaria irakurri dugu Miren Galdosen artikulua.

Fisioterapia obstetriko eta uroginekologikoan espezialista  da Miren Galdos, eta masterra egin du Neuromiostatika Biszeralean. Honela dio:

Zoru pelbikoa gure pelbisaren azpialdea estaltzen duen ehun multzoari deritzogu. Zoru pelbikoa, ehun muskularraz gain, ehun konektiboz osatuta dago. Ehun konektibo horren garrantzia, proportzioari dagokionez, handiagoa da: zoru pelbikoaren %80 ehun konektiboa da eta %20, ehun muskularra.

Aldaketak

Zoru pelbikoak –gizon zein emakumeengan– bizitzan zehar aldaketak jasango ditu. Gizonezkoek 50 urtetik aurrera –datu estimagarria da– izan ditzakete desegokitzapenak –disfuntzio sexualak, prostata ebakuntzen ondorioz gertatutako disfuntzioak: gernu galerak.
Emakumeei dagokienez, haurdunaldia eta erditzea da egoera bortitzena, baina menopausiak ere badu bere garrantzia, aldaketa hormonalak ere badakar-eta ehunen desegokitzapen garrantzitsua.

Denboraren poderioz eta, batez ere, ohitura txarren ondorioz –postura txarrak, idorreria, ariketa fisiko hiperpresiboa–, zoru pelbikoak desegokitzapenak pairatuko ditu eta hainbat disfuntzio izan ditzakegu: gernu galerak, disfuntzio sexualak, organoen prolapsoak…
Proportzionaltasun hori aintzat hartuz, zoru pelbikoa lantzeko erabiltzen diren teknikak espezifikoak dira: gimnasia abdominal hipopresiboa, irrati-frekuentzia, bibrazioa, biofeed-backa, elektroestimulazioa, kegelak…

Haurdunaldia

Emakumeen bizitzan aurrez aipatutako egoeran egingo dut nire luzapena: haurdunaldian.
Denbora laburrean emakumeak duen pisu igotze bortitzak  egoera latza dakar, pisu hori jasaten duen zoru pelbikoarentzat –garrantzitsua, beste hainbat arrazoirengatik ere, haurdunaldian amaren pisua zaintzea.

Erditze momentua iritsita, bertan izango diren egoerek ere kaltetzen dute zoru pelbikoa. Erditze oso instrumentalizatua bada –forceps-ak, episiotomiak)–, zoru pelbikoak askoz kalte handiagoa jasaten du. Horrez gain, bultzatze denbora erabakigarria izango da: zenbat eta espultsibo luzeagoa, orduan eta kalte handiagoa. Horregatik, erditu aurretik, gertakuntza ona egitea garrantzitsua da.

Gertakuntza, garrantzitsua

Zoru pelbikoa lantzeko era egokienetakoak masaje perineala eta epi-no erabilera izan daitezke. Izan ere, helburua da zoru pelbikoko ehun konektibo eta muskularra elastifikatzea. Bestalde, garrantzitsua da artatzen gaituen profesional taldearen tendentzia. Gero eta arruntagoa da erditze fisiologikoan oinarritutako atentzioa, baina oraindik ere bada praxi protokolarioagoa erabiltzen duen profesional sektore bat.

Dena gure esku ez badago ere, uste dut gure esku dagoen dena egitea garrantzitsua dela.
Esan beharra dago, erditu ostean reedukazio on bat egitea garrantzitsua dela aurrez aipaturiko desegokitzapen denak berriz puntuan ipintzeko. Hori gutxi gorabehera 6 hilabeteko lana da, gero indibidualtasunak aztertu beharko dira, ezberdina baita disfuntzio handia edo lesio gabeko perineaz hitz egiten ari bagara.

Iturria: Puntua aldizkaria.