Quantcast

Zergaitik da kartoia jolaserako aproposa?

 

Kartoizko kaxa batek eskaintzen dizkigun aukerak gutxitzen doaz urteak betetzen eta  handitzen garen heinean. Hiru urteko pertsona batentzat kaxa bat, autoa, etxea, itsasontzia, elefantea izan daiteke, ezkutalekua, kobazuloa… Niretzat gauzak gordetzeko zerbait da, gutxi gehiago.  Zer da zuretzat kartoizko kaxa bat???

 

Esango nuke, haurtzaroan irudimena garatzeko gero eta aukera gutxiago eskaintzen dizkiegula haurrei; autoak, etxeak, itsasontziak eta elefanteak erosten eta eskaintzen dizkiegu eta agian ez gara konturatzen etxean edo azpiko dendan dohain ditugula guztiak. Kartoizko kaxa baten forman.

Jolas sinbolikorako elementu ezin aproposagoa da beraz kartoia, kartoizko  kaxak. Eta gehiago esango nuke, gurasoentzako ere aitzakia polita dira sormenerako, berriro haurtzaroko askatasunera itzultzeko. Ez da baina horren erraza … edo bai?

Guraso asko gabiltza birziklapenaren garrantzia azpimarratzen eta haurrekin batera naturarekiko errespetua lantzen. Etxean edo beste norbaitek bota behar duen hori hartu eta guretzat baliozkoa den zerbaitetan bilakatzen dugun bakoitzean hori erakusten ari gara. Birziklatu dezakegula. Balorea eman sortzen ditugun hondakinei!

Bergarako Kartzela Zaharreko  Haur eta Guraso asanbladakook bi aldiz egin dugu kartoizko kaxekin jolasteko  ekintza. Talde handia garenez kartoi dezente behar genuen.Familia bakoitzak batzuk ekarri zituen, etxetik. Gu  haurrekin batera joan ginen denda ezberdinetara  eta bota behar zituzten kartoiak eskatu genizkien. Denda bakarrean lortutakoarekin nahikoa izan genuen.

Tamalez gure kontsumo ohiturek,  botatzeko den kartoi eta kutxa asko sortarazten dizkigute. Hondakina den material hau erraz lortzeko aukera dugu, garbia izaten da eta erraz garraiatzeko modukoa. Astean egun batzuetan komertzio, jatetxe eta tabernek kartoia botatzen dute. 

Materialaren hauskortasuna  ezaugarri negatibo moduan uler dezakegu. Haurrek sortuko duten etxe eta auto hori erraz apurtuko da eta! Dena den kontrara ere bizi dezakegu ezaugarri hori. Zaindu egin beharko dute sortutakoa eta hori  ikasgai polita izan daiteke!

Esan dugun moduan jolas sinbolikorako oso aproposak dira  kartoia eta kartoizko kaxak. Irudimenarekin, trenak, itsasontziak, edo koheteak sor ditzakete haurrek. Irekita dagoen jolasa da. Denbora eta lasaitasuna behar dira, besterik ez!

Baina haurrentzat aproposa dena gurasoontzat ere oso erakargarria da. Behin prozesuan sartuta guk ere etxetxoa sortu nahi izaten dugu, edo kotxea edo itsasontzia. Esan bezala, talde handian egin dugu saiakera Kartzela zaharreko asanbladan. Eta hausnarketa pertsonalerako bide ere eman dit esperientziak. Nire burua oroitzen dut alabak hasitako kotxea tuneatzen, fokoak jartzen eta erruberak marrazten. Berari sortzen utzi beharrean ni neu jota sua sorkuntzan murgilduta, emaitzari begira eta ez prozesua baloratzen. Ez dut gezurrik esango, ondo pasatu nuen, baina hausnarketarako gako batzuk eman dizkit oroitzapenak. Nik emaitzari eman nion garrantzia, nire diskurtsoan beste zerbait aldarrikatzen dut baina; momentuari,prozesuari eman beharko geniokeela garrantzia. Bestalde modu honetan, nire ilusio eta gogoarekin haurren sortzailetasuna ez ote nabil zapaltzen???

Kartoiarekin jolasteko Makedo material berria erosi dugu asanbladako haur eta gurasook, azken urteetako ekintzetan lortutako diru apurrarekin. Datorren ikasturtean ere sortuko dugu aitzakia taldean kartoiaz gozatzeko. Kontatuko dizuet zer gertatzen den.

 

 

landerjuaristi

Guraso.eus eko edukiak koordinatzen ditut. Kolaborazioak jaso eta proiektuan txertatu. Txatxilipurdiko saltsetan bustitzen naiz, Txapa irrati librean saioa egiten dut, guraso ere banaiz. Ikasten jarraitzen dut.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading