Quantcast

Urrats administratiboak

Umea jaioakoan egin beharreko urrats administratiboak

Guraso.eus-eko atal honetan umea jaiotakoan egin behar diren urrats administratiboen gida bat egin nahi dugu. Oraingoz, Euskal Erkidego Autonomoko tramiteak eta informazio gida osatzen gabiltza.

Eskatu eta bete behar diren agiriak asko dira. Egin beharreko joan-etorriak ere bai. Oso ohikoa da agiriak galtzea edo alferrikako joan-etorriak egitea. Horrelakoak saihesteko lehenik eta behin gomendio bat: erosi karpeta bat eta gorde bertan agiri guztiak.

Hasiera batean sartu karpeta horretan:

  • bi gurasoen nortasun agiriak (originalak eta pare bat kopia)
  • familia liburua edukiz gero (originala eta idatzita dauden orri guztien pare bat kopia)

Leku batzuetan originala eskatzen dute, beste batzuetan kopiak. Pare bat kopiarekin hasi. Erabiltzen dituzuen neurrian kopia berriak atera.


AURKIBIDEA

 

0- AMATASUN ETA AITATASUN BAIMENAK

1- OSPITALEAN

2- ERREGISTRO ZIBILEAN

3- UDALETXEAN

4- FAMILIA SENDAGILEA

5- AMAREN LANTOKIAN

6- AITAREN LANTOKIAN

7- GIZARTE SEGURANTZAKO TRAMITEAK

8- OSASUN TXARTELA ETA PEDIATRAREN IZENDATZEA

9- HAURRA ASEGURU PRIBATU BATEAN SARTZEA (AUKERAZKOA)

10- OGASUNEKO HOBARIAK

11- SEME-ALABENGATIKO  DIRU-LAGUNTZAK

12- HAURRAREN NORTASUN AGIRIA


0- AMATASUN ETA AITATASUN    BAIMENAK

 

Amatasuna:

16 aste. Horietako sei nahitaezkoak.

Bikiak: 18 aste. Hortik aurrera bi aste gehiago haur bakoitzeko.

Haurrak %33ko ezintasuna edo gehiago badu, bi aste gehiago.

Aitatasuna / bigarren ama:

13 egun  NATURALAK + 2 ospitalizazioagatik (2 erditze ostekoak ospitalizazioagatik lan hitzarmenaren arabera)

16 asteren barruan hartu beharrekoak. Badago lan jardun erditan hartzea, enpresarekin adostuta.

Bikiak: 17 egun NATURALAK. Bi egun gehiago haur bakoitzeko. Biek batera edo bata bestearen jarraian izan ahalko dute, baina etenik gabe.

Haurra izan duen amak bikotekidearekin banatu dezake baimena, lehenengo sei asteak kenduta. Guztiak, erdiak, astebete, egun batzuk… bikotekideari emanez.

Lanaldi partzialeko atsedenaldia:

Amatasunagatik, adopzioagatik edo harreragatik har daitekeen atsedenaldia lanaldiaren zati baterako bakarrik hartzen denean, honako arau hauek hartuko dira kontuan:

Ezinbestekoa izango da enpresaburuak eta langileak aurretik erabakitzea.

Bi gurasoek balia dezakete eskubidea, eta atsedenaldia aldi berean edo elkarren segidan hartu.

Erditzearen kasuan, amak ezin izango du hurrengo sei asteetan baimenaren modalitate hau baliatu.

Baimen mota honek ez du iraupen finkorik; egiten den lanaldiaren araberako proportzioan luzatuko da.

Baimena etenik egin gabe baliatu behar da.

Lanaldi partzialeko amatasun baimena baliatzeko aldian, langileek ezin izango dute aparteko lanordurik egin, salbu eta ezbeharrak eta aparteko zein premiazko kalteak saihesteko edo konpontzeko beharrezkoa ez den.

Lanaldi partzialeko amatasu baimena ez da bateragarria izango honako hauekin:

Langileen Estatutuan aurreikusitako eskubideak, hain zuzen, edoskitze-aldirako eskubidearekin eta legezko zaintzagatiko lan-jardun murrizketarekin.

Familiako kideak zaintzeagatik eszedentzia-eskubidea baliatzearekin.

Edoskitze baimena:

Egunean ordubete haurrak bederatzi hilabete bete arte, amatasun baimena bukatzen denetik.

Denbora hori batu daiteke eta egunetan hartu.

Ordu hori egunean zehar banatzen da.

Berez, ezin da ordubete lehenago atera edo sartu, baina hori enpresarekin adostu daiteke.

Langabezia prestazioa jasotzen duen amak:

 

Amatasun prestazioa jasotzeko aukera izango du, umea eduki eta lanbideko prestazioa kobratzen dagoen amak.

Prestazio hau jasotzeko Gizarte Segurantzara joan behar da, bertara Lanbiden eskatu beharreko ziurtagiria eraman beharko du.(enpresa ziurtagiriaren baliokidea)

Lanbideko ziurtagiria lortzeko umea edukitakoan ospitalean ematen dizuten paperekin lanbidera joan beharko da

amatasun txosten medikua (kolore horia). Ziurtatu erditzea artatu duen sendagileak edo emaginak sinatu duela.

ospitaleko alta agiria (irteterakoan jaso behar duzue)

GORA



1- OSPITALEAN

 

Umea jaio ondoren ospitalean jasoko dituzue:

  • amatasun txosten medikua (kolore horia). Ziurtatu erditzea artatu duen sendagileak edo emaginak sinatu duela.
  • estatistika buletina (kolore gorria edo urdina). Galdetu ospitalean, batez ere zuen asmoa umea beste herri bateko Erregistro Zibilean erroldatu behar baduzue.
  • ospitaleko alta agiria (irteterakoan jaso behar duzue).

Ospitaleak erditzearen inguruko datuak jasotzen ditu agiri horietan (erditze ordua eta abar…). Gainerako datuak zuek bete behar dituzue. Denbora hartu datu dezente eskatzen dituztelako.

Oharra: Indarrean da Erregistro Zibileko urratsak ospitaletik bideratzeko legea. Ikusteko dago nola bideratzen den aldaketa. Informazio gehiago hemen.

Captura de pantalla 2015-03-18 a las 14.12.33

GORA


2- ERREGISTRO ZIBILEAN

 

Jaioberria Erregistro Zibilean erroldatu behar duzue: jaio den herrian edo biziko den herrian. Umeak jaio eta 24 ordura egin daiteke tramite hau, eta zortzi eguneko epean.

Oharra: Indarrean da Erregistro Zibileko urratsak ospitaletik bideratzeko legea. Ikusteko dago nola bideratzen den aldaketa. Informazio gehiago hemen.

Orain arte, gauzak honela egin behar izan dira:

Gurasoak ezkonduta badaude nahikoa da bietako bat joatea. Horrela ez bada, beharrezkoa da bi gurasoak joatea. Eta beharrezkoa da biak joatea umearen abizenen ordena aldatu nahi baduzue. (Oharra: zenbait tokitan bi gurasoen presentzia eskatzen dute beti. Beste batzuetan beharrezkoa da nahiz eta bikotea ezkonduta egon ezberdina delako umea jaio den eta erroldatu nahi duzuen herria).

Eskatuko dizkizueten agiriak dira: gurasoen nortasun agiriak, familia liburua (ez badaukazue bertan egingo dute), amatasun txosten medikua (horia) eta estatistika buletina (gorria edo urdina). Gurasoetako bat aurretik ezkonduta egon bada banaketa edo dibortzio sententzia.

Umea ez bada erroldatzea nahi duzuen herrian jaio, gurasoen errolda agiria eskatuko dute Erregistro Zibilean. Udaletxean eskatu behar duzue gurasoen errolda agiria. Eska daiteke erditzea baino lehen. Gehienez, hilabete bat lehenago baliagarritasuna ez galtzeko.

Zuen asmoa bada jaioberriari nortasun agiria egitea, eskatu haurraren jaiotza agiri literala (sei hilabetez da baliagarria).

Atera bi kopia umearen datuekin familia liburuan bete duten orri berriari. Eta gorde karpetan.

Euskarazko izenak

Izenarekin arazorik ez izateko, kontsultatu aurrez Euskaltzaindiaren izendegi-zerrendetan. Bestela, egin kontsulta aurrez Erregistro Zibilean.

Euskaltzaindiaren webgunean pertsonen izendegia ageri da:

 

Abizena euskal grafiaz

Bestalde, abizena euskal grafiaz jartzeko urratsak UEMAko webgunean aurki ditzakezue.

GORA


 

3- UDALETXEAN

 

Jaioberria erroldatu egin behar da bizi izango den herrian. Aurkeztu beharko dira:

  • aitaren edo amaren nortasun agiria (bat joatearekin nahikoa da)
  • familia liburua
  • gurasoen errolda agiriak

Tramitazioa egindakoan eskatu haurraren errolda agiriaren hiru kopia. Beharko dituzue Gizarte Segurantzan, osasun txartela zein nortasun agiria eskuratzeko (hiru hilabeteko iraungitze epea du).

Hiri handietan hiritarren arreta zerbitzu bat baino gehiago dituzte. Galdetu udaletxean nora jo behar duzuen atzera eta aurrera ibili aurretik.

Gogoratu, baita ere, seme-alabengatiko diru-laguntzak eskatzeko beharrezko dokumentuak eskatzeaz.

 

GORA


4- FAMILIA SENDAGILEA

 

Amatasun baimena tramitatzeko beharrezkoa da amaren familia medikuarekin egotea. Eskatuko dituzten agiriak dira: amaren nortasun agiria eta ospitaleko alta agiria.

Amatasun baimenaren agiria emango digu sendagileak.

Baimenduta dago agiri hori ama ez den beste pertsona batek jasotzea.

GORA


5- AMAREN LANTOKIAN

 

(langile autonomoek ez dute urrats hau eman behar)

Amatasun baimenak gaixotasun baimenaren funtzionamendu berdina du. Enpresak hartzen du bere gaindi lehen bi egunetako soldata, eta gainerakoak (16 asteko epera arte) Gizarte Segurantzak hartzen du bere gaindi. Horregatik da beharrezkoa enpresako pertsonal sailak soldataren inguruko agiria egitea.

Enpresara eraman beharreko agiriak dira:

  •  familia liburua
  •  amaren nortasun agiria
  •  amatasun baimenaren txostena (familia medikuak emandako agiria)

 

Amatasun baimenak edoskitze baimena ematen du: ordubeteko baimena egunero 20 astez. Ordu kopuru hori bateratu daiteke amatasun baimena luzatzeko. Ordu kopuru hori noiz hartu enpresarekin adostu behar da. Normalean amatasun baimenaren ostean hartzen da.

Enpresa batzuetan berehala egiten dute soldataren gaineko ziurtagiria. Beste batzuetan denbora bat behar dute. Deitu aurrez telefonoz eta galdetu. Akaso joan-etorriak saihets daitezke agiriak emailez edo beste bide batez bidalita.

Langabezia prestazioa jasotzen egonez gero langabezia bulegora jo behar da. Langabezia prestazioa eten egiten da amatasun/aitatasun prestazioa jasotzen den bitartean. Eraman beharreko dokumentazioa berdina da, eta enpresetan moduan agiri bat emango digute.

Captura de pantalla 2014-12-11 a las 12.03.18

GORA


6- AITAREN LANTOKIAN

 

Aitatasun baimena amatasun baimenak moduan funtzionatzen du. Iraupena, hori bai, 13 egunekoa da.

Eskatuko dizkigute:

  • familia liburua
  • aitaren nortasun agiria.

Badira urte batzuk aitei amatasun baimenaren zati bat hartzeko aukera ematen zaiela. Bikotearen erabakia da banaketa zelan egin. Gizarte Segurantzarako bete behar den agirian zehaztu behar da puntu hori –ikus 7. urratsa–. Aukera dago, baita ere, baimen egunak jardunaldi erdika banatzeko. Hemen ere joan-etorriak saihestu aldera galdetu tramiteak emailez edo faxez egin daitezkeen.

. Langabezia prestazioa jasotzen ari bagara, langabezia bulegoan egin behar dugu tramitazio hau.

. Familia ugarien edo jaiotza goiztiarren kasuan aitatasun baimena apur bat handiagoa da. Gizarte Segurantzan ematen dute horren berri. –ikus 7. urratsa–

. Teorian 2015eko urtarrilaren 1etik aurrera aitatasun baimena 30 egunekoa izango omen zen. Omenean gelditu gara oraingoz.

GORA


 

7- GIZARTE SEGURANTZAKO TRAMITEAK

 

Hiru tramite egin behar dira Gizarte Segurantzako bulegoan: amatasun baimenari dagokion prestazioarena, aitatasun prestazioari dagokiona, eta jaioberriaren afiliazioa.

Amatasun prestazioa tramitatzeko eskatuko dizkiguten agiriak:

  • amaren nortasun agiria
  • familia liburua
  • amatasun baimena (familia medikuak emana)
  • amaren lantegiko ziurtagiria (soldatapekoa izanez gero)
  • autonomo ordainketen azken hiru ziurtagiriak (banketxean eskatu)
  • amatasun, adopzio edo harrera eskaera agiria. (Gizarte Segurantzako bulegoan ematen dute)
  • Modelo 145 agiria amaren datuekin (Gizarte Segurantzako bulegoan ematen dute)

Aitatasun prestazioa tramitatzeko eskatuko dizkiguten agiriak:

  •  aitaren nortasun agiria
  •  familia liburua
  •  jaioberriaren errolda agiria
  •  aitaren lantegiko ziurtagiria (soldatapekoa izanez gero)
  •  autonomo ordainketen azken hiru ziurtagiriak (banketxean eskatu)
  •  aitatasun eskaera agiria (Gizarte Segurantzako bulegoan ematen dute)
  •  modelo 145 agiria aitaren datuekin (Gizarte Segurantzako bulegoan ematen dute)

Umea afiliatzeko eskatuko dizkiguten agiriak:

  • familia liburua
  • jaioberriari izena emateko Gizarte Segurantzako txartela (gehienetan amarena)
  • amaren osasun txartela
  • haurraren afiliazio agiria (Gizarte Segurantzako bulegoan ematen dute)

 

. Bai amak bai aitak aurkezten dituzten bi agiriak sinatuta aurkeztu behar dira. Hartu kontuan alferreko joan-etorririk ez egiteko. Interneten dago eskuragarri agiri hori.

. Zenbait hiri handitan txanda eskatu behar da. Eskatu lehenbailehen eta gogoratu hiru tramite direla. Eskatu hiru txanda jarraian.

. Gurasoek bete beharreko bi agirietan galdetuko dizuete prestazioa jasotzerakoan zein erretentzio aplikatzea nahi duzuen. Begiratu soldatetan zein erretentzio aplikatzen zaizuen, eta eman zenbaki berdina.

. Gizarte Segurantzako txartelik ez baduzue lan kontratuaren hasieran lor dezakezue eskatzen duten afiliazio zenbakia.

GORA


 

8- UMEAREN OSASUN TXARTELA EGIN ETA PEDIATRA IZENDATZEA

 

Pauso honetan beharrezkoa da sendagilea dugun osasun zentrora gerturatzea. Aurkeztu behar diren agiriak dira:

  • familia liburua
  • haurraren errolda agiria
  • haurraren afiliazio agiria (aurreko pausoan eman digute)
  • haurraren osasun txartel indibiduala eskatzeko agiria (bertan ematen dute)

Ez da beharrezkoa pediatra izendapena eskatzea haurrarentzako aseguru pribatu bat kontratatzea erabaki baduzue eta aseguru pribatu horretako pediatrarekin egin behar badituzue kontsulta guztiak —ikus 9. urratsa—. Kontuan hartu, dena den, zerbitzua ona dela. Pediatrak, sarri, erizain bat du laguntzaile.

osakidetza-medikua

GORA


9- HAURRA ASEGURU PRIBATU BATEAN SARTZEA (AUKERAZKOA)

 

Zenbait familiak aseguru pribatu bat kontratatzearen aldeko hautua egiten dute. Eskatuko digute familia liburua.

Kontuan hartu zenbait aseguru pribatutan erditze osteko egun batzuetarako zerbitzua besterik ez dutela eskaintzen. Ondo informatu.

GORA


 

10- OGASUNEKO HOBARIAK

 

Hilean ehun euroko laguntza da lanean dauden amendako haurrak hiru urte bete arte. Hobaria jaso badugu errenta aitorpenean agertu behar da. Eskaera egiteko ogasun agentziaren bulego batera jo behar dugu. Aurkeztu behar ditugun agiriak:

  • amaren nortasun agiria
  • familia liburua
  • amaren afiliazio zenbakia (Gizarte Segurantza)
  • eskaera agiria (bertan ematen dute)

Lehenengo urtean soilik egin behar da eskaera. Gero, automatikoki berritzen da. Tramitea telefono bidez ere egin daiteke: 901 200 345. Identifikatzeko amaren errenta aitorpeneko datu bat eskatuko dute. Eduki eskura.

GORA


 

11- SEME-ALABENGATIKO DIRU-LAGUNTZAK

 

Eusko Jaurlaritzak ematen duen JAIOTZAGATIKO DIRU-LAGUNTZA.

Aurkeztu beharreko dokumentazioa eta informazioa hemen aurki dezakezue.

“I” inprimakia bete eta ordezkaritzan aurkeztu behar duzue azpian zerrendatu dugun dokumentazioarekin batera. Zalantzak izanez gero kontsultatu 012 telefonoan. Bertan Administrazioarekin lotutako galderak eta eskaerak bideratzen dituzte. Erabilgarri dago astelehenetik ostiralera, 8:00etatik 19:30era.

  • eskatzailearen edo bere ezkontidearen edo bikotearen NANaren, AIZren edo pasaportearen fotokopia.
  • laguntza eskatzen duen pertsonaren bizikidetza-unitateko kide guztiak jasotzen dituen familia liburuaren, jaiotza agiriaren edo parekoren baten kopia konpultsatua. (Erregistro Zibilean ematen dituzte, doan)
  • eskatzailearen errolda agiri eguneratua, etxean bizi diren lagun guztien zerrenda udalerrian erroldatu izanaren eguna barne. Laguntza-eskaera aurkezten den eguna baino hilabete bat baino lehenago emandako errolda agiriak ez dira onartuko. (Haurra erroldatzeko eskatu). Eskaera aurkeztu aurreko urtean eskatzailea ez bada bizi izan edo ez bada jarraitutasunez erroldatuta egon Euskal Autonomia Erkidegoko edozein udalerritan, egungo erroldatze-ziurtagiriaz gaindi (ziurtagiri horretan eskatzailearekin batera bizi diren lagun guztiak agertuko dira), azken hamar urte hauetan bost urtean jarraian EAEko udalerriren batean erroldatuta egon dela egiaztatzen duen errolda agiria aurkeztu beharko du.
  • diru-laguntza kobratu nahi den aurrezki-libretaren edo banku-kontuaren titulartasun datuen fotokopia. Nahitaez, eskatzaileak aurrezki-libretaren edo banku-kontuaren titularra izan beharko du.
  • izatezko bikotea izanez gero, hori egiaztatzen duen agiria.
  • adopzioaren, harreraren edo tutoretzaren kasuan, hura gauzatzeko ebazpen judizialaren edo antzeko dokumentuaren fotokopia.
  • eskatzailearen ezkontza deuseztatu bada, edo epai judizialen bitartez eskatzailea banandu edo dibortziatu bada, seme-alaben zaintza eta jagoletza esleitzen duen ebazpen judizialaren fotokopia. Era berean, ebazpen judizialaren arabera, zaintza eta jagoletza partekatua bada, laguntzaren eskatzailea nor izango den zehazteko lortutako akordio sinatua aurkeztu beharko da.
  • eskatzaileari edo haren ardurapeko pertsonei % 33ko edo goragoko ezgaitasuna onartu bazaie, ezgaitasun mailaren berri ematen duen indarreko ziurtagiria aurkeztu beharko da, eskumenezko erakundeak emana.
  • genero indarkeriaren biktima izanez gero, hori egiaztatzen duen ziurtagiria.
  • emandako laguntzak edo diru-laguntzak direla-eta, eskatzaileak ez duela Euskal Autonomia Erkidegoko Administrazio Orokorrak hasitako itzultze- edo zehapen-prozedurarik irekita dioen aitorpen erantzulea (inprimakian).
  • gainera, eskaeran eta horrekin batera doan dokumentazioan azaltzen diren datuak egiazkoak direla eta laguntzen onuradun izateko indarrean dagoen arautegiak ezartzen dituen baldintzak betetzen dituela adierazten duen aitorpen erantzulea. (inprimakian).
  • diru-laguntzaren eskatzailearen eta bere ezkontidearen edo bikotekidearen baimena, Familia Politikarako eta Komunitate Garapenerako Zuzendaritzak zuzenean lor dezan euskal foru-ogasunetatik familia-unitatearen errenta. (inprimakian).

 

ONURADUNAK ETA XEHETASUNAK

      Familia-unitatea osatzen duen aita edo ama izan daiteke diru-laguntza horien onuraduna.

Era berean, seme-alaben elkarbanatutako zaintza- eta babespe-egoeretan, ebazpen judizialez ezarria, eta, betiere, elkarbanatutako zaintza eta babespea duten aitak eta amak sinatutako akordioa aurkeztu beharko da. Akordio horretan zehaztuko da bietatik nork eskatzen duen diru-laguntza, onuraduna pertsona bakarra baita.

Onuradunak Euskal Autonomia Erkidegoko edozein udalerritan bizi behar du modu eraginkorrean, eta bertako erroldan egon, gutxienez eskaera aurkeztu baino urtebete lehenagotik. Euskal Autonomia Erkidegoko edozein udalerritan bizi eta erroldatuta dagoen orok diru-laguntza horiek eskatu eta jaso ditzake, aurreko hamabi hilabeteetan bertan etengabe bizi ez izanagatik eta erroldatuta ez egonagatik ere, baldin eta egiaztatzen badu azken hamar urteetan bost urte segidan eman dituela Euskal Autonomia Erkidegoan bizitzen eta erroldatuta.

Halaber, onuraduna laguntzak helburu duen seme-alabarekin erroldatuta egon beharko du, bai eta familia-unitatearen eraketa zehazteko zenbatutako seme-alaba guztiekin ere.

Diru-laguntza jaso dezaketen egoerak

    Kapitulu honen babesean honako laguntza hauek eman daitezke:

a) lehen seme-alabagatiko laguntza.

b) bigarren edo ondorengo seme-alabagatiko laguntza.

c) hirugarren edo ondoko seme-alabagatiko diru-laguntza.

    Semeak edo alabak familia-unitatean duen ordena zehazteko kontuan hartuko da elkarrekin bizi diren seme edo/eta alaben artean duen tokia, jaiotza-dataren arabera.

Diru-laguntzak honako hauek izango dira:

Lehen seme-alabagatiko diru-laguntza: ordainketa bat jaiotzagatik, adoptatzeagatik, adopzio aurreko familia-harreragatik edo tutoretzagatik.

Bigarren seme-alabagatiko diru-laguntza: ordainketa bat jaiotzagatik, adoptatzeagatik, adopzio aurreko familia-harreragatik edo tutoretzagatik, eta bigarren ordainketa bat urte bat betetzen duen urtean.

Hirugarren edo ondoko seme-alabagatiko diru-laguntza: ordainketa bat jaiotzagatik, adoptatzeagatik, adopzio aurreko familia-harreragatik edo tutoretzagatik, eta sei ordainketa gehiago urte bat, bi, hiru, lau, bost eta sei urte betetzen dituen urteetan.

Diru-laguntzaren zenbatekoa laurehun (400) eta bederatziehun (900) euro artekoa izango da, familiaren errenta estandarizatuaren arabera, eta hurrengo mugen arabera:

  • 20.000 eurotik beherako familia-errenta estandarizatu batentzat, zenbatekoa bederatziehun (900) eurokoa izango da.
  •  20.000 eurotik gorako eta 30.000 eurotik beherako familia-errenta estandarizatu batentzat, zenbatekoa bostehun (500) eurokoa izango da.
  •  30.000 eurotik gorako familia-errenta estandarizatu batentzat, zenbatekoa laurehun (400) eurokoa izango da.

Artikulu honetan aurreikusitako laguntzak metagarriak izango dira, eta, beraz, ezarritako adina eta ordena betetzen dituen seme eta/edo alaba bakoitzeko diru-laguntza bana jasotzeko aukera izango da.

Aurkezteko epe-muga:

ARDURAPEKO SEME-ALABAGATIKO LAGUNTZAK

  1. Urte naturalaren (urtarrilak 1- abenduak 31) barruan jaiotza, adopzio edo adopzio aurreko familia-harrera bat gertatzen bada, eskaerak hiru hilabeteko epean aurkeztuko dira, jaiotzaren egunaren, adopzioa edo adopzio aurreko familia-harrera gauzatzeko ebazpen judizialaren edo antzeko dokumentuaren egunaren, edo eskatzaileari jakinarazi zaion egunaren biharamunetik zenbatzen hasita. Kasu honetan, Formularioak atalean dagoen I Eskaera erabili behar da.
  1.  Urte bakoitzeko urtarrilaren 1ean familia-unitatean jasota dauden seme eta/edo alabei dagozkien laguntzei begira, eskaerak urte naturalaren barruan aurkeztu beharko dira, hain zuzen ere semeak edo alabak dagokion adina betetzen duen urte naturalean. Kasu honetan, Formularioak atalean dagoen M Eskaera erabili behar da.

GORA


 

12- NORTASUN AGIRIA

 

Hamalau urterekin atera behar da nortasun agiria, aurretik ez da nahitaezkoa. Haurrak atzerrira bidaiatu behar badu, ordea, baliteke eskatzea eta komenigarria da edukitzea. Nazioarteko hegaldietan, esaterako, nahitaezkoa da. Nortasun agiria eskatzeko bulego batera jo behar duzue. Eskatuko dizkiguten agiriak:

  • haurraren errolda agiria (Udalak ematen du).
  • haurraren jaiotza agiria (Erregistro Zibilean ematen dute).
  • haurraren argazki bat (32 X 26 mm).
  • haurrak nahitaez egon behar du bulegoan.

Eskatu txanda aurrez.

GORA


AZKEN OHARRAK

 

Haurrak ez du zertan bulegoz bulego ibili. Bere presentzia beharrezkoa da soilik tramite batean, nortasun agiria eskatzeko unean. Ez bada premiazkoa tramite hori atzeratu dezakezue zenbait hilabetez.

Gero eta gehiago dira Internet bidez burutu daitezkeen tramiteak. Kontsulta egin dezakezue hemen.

Gida hau baliagarria eta ulerkorra izan dadin ezin gara ematen diren kasu ezberdin guztietan sartu. Familia egituraren arabera (guraso bakarra, familia ugaria, sexu bereko bikoteak, adopzioak…) kontsulta egitea gomendatzen dugu.

Gida honetan okerren bat aurkitzen baduzu edo aldaketaren bat proposatu nahi badiguzu idatzi, mesedez. Denon artea osatuko dugu.

 

GORA

 

loading