Quantcast

Unai Perez de San Roman: “Drogekin bizitzen jakin behar dugu”

Ailaket!! elkarteko kidea da Perez de San Roman. Aisialdi esparruan ematen den droga kontsumoaren prebentziorako ekimenak egiten dituzte. Testing, Lonjalaket eta Botiltzarra ekimenak egiten dituzte.

Argazkiaren iturria : hemen

Ailaket!! droga erabiltzaileen eta erabiltzaile ohien elkartea da. 2002an sortutakoa drogen kontsumoarekin lotutako arriskuak murriztea dute bertan helburu. “Ezagutzen diren kultura guztietan egon  dira drogak eta egongo dira. Beraz, gure filosofia edo premisa da drogekin bizitzen jakin behar dugula”, adierazi du Unai Perez de San Romanek. “Erantzukizunez kontsumitu daiteke, baina horretarako informazioa izatea ezinbestekoa da. Hor kokatzen dugu gure lana”, gaineratu du.

Testing ekimena

Ailaket!! elkartean 2002an hasi ziren Testing izeneko ekimenarekin. “Festa giroko esku-hartzea da. Zerbitzu anonimoa, konfidentziala, eta doakoa da”, azaldu du elkarteko kide Saioa Nuñezek. “Bi gune jarri ohi ditugu: aholkularitzarako gunea eta sustantzien analisirako gunea. Kokainaren sustantzia aktiboa, esaterako, kokaina da baina droga gehienak moduan moztuta egoten da. Hau da, beste sustantzia batzuk izaten ditu eta horiei sustantzia isuntzaileak esaten diegu. Erabiltzaileei informazio hori ematen diegu: printzipio aktiboari buruz eta  isuntzaileei buruz; izan ere, isuntzaileak ere badituzte bere arrisku propioak”. Testing ekimena martxan izan dute, esaterako, Arrasateko Maritxu Kajoi egunean.

Lonjalaket ekimena

Gazteen lokaletan drogaren prebentziorako egiten duten esku-hartzea da. “Drogarik hartzen ez dutenen artean ez kontsumoaren erabaki hori indartzea dugu helburu, eta kontsumitzen ari direnen artean arriskua murriztea”, adierazi du Unai Perez de San Romanek. “Zailena izaten da lehenengo pausoa ematea; lokaletara sartzea. Drogen kontsumoaren gaiarekin batera lokalen erabileraren inguruko gomendioak ere egiten ditugu bizikidetzara edo segurtasunera begira”, esan du. “Orokorrean erabakiak hartzeko gaitasuna lantzen dugu eta aukera ematen badigute eztabaidak ere sustatzen ditugu, esaterako, drogen kontsumo arduratsuaren inguruan. Posible da, ez da posible?”

Botiltzarra ekimena

Ailaket!! elkartearen ekimenen artean gazteenetarikoa da. Kalean alkohola edaten ari diren gazteei zuzendutako prebentziorako esku-hartzea dela adierazi dute. “Mozorrotuta hurbiltzen dira gazteengana. Lehenengo pauso hori ematea bestela oso bortitza da”, esan du Perez de San Romanek. “Polizia edo halakoren bat zarela pentsatzen dute berehala. Konfiantza falta hori apurtzeko modu bat da mozorrotzea, ileorde bat ipintzea. Ondo hartzen zaituzte; izan ere, normalean gauzak ematen zoaz: jarraibideak dituen pegatinak, esaterako”.

Ailaket!! elkarteko Saioa Nuñez eta Unai Perez de San Roman.

 

 

 

 

 

 

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading