Quantcast
Guraso.eus

Umea, beti aulkitxoan

Zirkulaziorako Araudi Orokorra aldatu duten zenbait berrikuntza sartu ziren indarrean urriaren 1ean, eta berrikuntza horiek umeak ibilgailuetan eramateko moduarekin daude lotuta. Arau berriek dioena laburbildu dute Puntua aldizkarian.

Captura de pantalla 2016-02-15 a las 10.50.34

Arau berriek sinplifikatu egiten dute aurrez bazegoena, eta fabrikatzaileek diotenaz fio dira; hau da, umearen aulkitxoa aurrera edo atzera begira muntatuko da ibilgailu barruan, fabrikatzaileak jarraibideen eskuorrian dioena aintzat hartuta.

Uztailaren 18an argitaratu zuten EAOn Zirkulaziorako Araudi Orokorraren moldaketa, eta, datozen lerrootan, bereziki kontuan hartu beharreko lau puntu laburbiltzen dira.

Umearen altuera
1,35 metrotik beherako adingabeek ibilgailuaren atzeko aldean joan beharko dute eta, gainera, ezin izango dira aurreko eserlekuan joan 18 urteak bete arte, edo 1,35 metroko altuera.
Salbuespen bakarra da ibilgailuaren atzeko eserleku guztiak umeen aulkitxoekin beteta badago. Kasu horretan, adingabea aurrean eseri ahal izango da, baina, betiere, homologatutako aulkitxoan eta bere adinerako eta pisurako egokia baldin bada.

Aulkitxoaren muntaia
Aulkitxo bakoitza bere jarraibideen arabera muntatuko da: ez da derrigorrezkoa aulkitxoa aurrera edo atzera begira muntatzea –martxaren noranzkoan edo kontrakoan–. Egin behar dena da aulkitxo modelo zehatz horren jarraibideek diotena. Salbuespen bakarra da aulkitxoa aurreko eserlekuan muntatzea airbaga desaktibatuta egon barik. Egoera horretan, debekatuta dago aulkitxoa martxaren kontrako noranzkoan jartzea.

Taxian nola?
Taxian bidaiatzerakoan, umetxoak aulkitxo barik joan daitezke, baina hiru barruan bakarrik: taxiaren atzeko partean joan daitezke euste neurri barik, baina ibilbidea hiri barruan bakarrik baldin bada.

Bederatzi eserlekutik gora
Ibilgailuak bederatzi eserleku baino gehiago dituen kasuetan, bidaiariak arautegiaz informatzea derrigorrezkoa da. Gidariak –edo taldeko arduradunak– bidaiariei jakinarazi egin behar die segurtasun uhala –edo homologatutako euste sistema– eroatea derrigorrezkoa dela. Eserleku guztietatik ikusteko moduko kartel, piktograma edo ikus-entzunezkoen bidez jakinaraziko da.

Isunak eta puntu galera
Adingabeak ibilgailuan aulkitxo barik eramateak umeen bizitza arriskuan jartzen du eta zenbait zigor ekar ditzake; besteak beste, gidabaimenaren hiru puntu galtzea eta 200 euroko isuna. Gainera, agenteek ibilgailua geldiarazi egin dezakete.

Aulkitxo egokiak
Merkatuan umeendako aulkitxo asko dago eta ez da erraza izaten aukeraketa egitea. Ezberdintasun handia dago modeloek eskaintzen dituzten ezaugarriei eta segurtasunari dagokienez, eta baita prezioari dagokionez ere.

Gaur egun, oso modelo merkeak ere badaude merkatuan; izan ere, 30 eurogatik eros daiteke aulkitxo bat, baina, Kontsumitzaileen eta Erabiltzaileen Elkartetik aurreratzen dutenez, prezioa eta segurtasuna lotuta daude. Low cost edo prezio txikiko aulkitxoak homologatuta egoten dira, marka garestiagoak bezala; hau da, segurtasun arauek ezarritako minimoak betetzen dituzte. Edozelan ere, egindako ikerketen arabera, ez dituzte gama handiagoko aulkitxoen segurtasun neurri berak eskaintzen.

Hori guztia kontuan hartuta ere, Kontsumitzaileen eta Erabiltzaileen Elkarteak hauxe azpimarratzen du: 1,35 metrotik behera daukaten umeak homologatutako aulkitxoetan eroatea derrigorrezkoa dela, hain zuzen. Eta, are gehiago, merkatuko aulkirik eskasena beti dela umea nagusi baten besoetan edo segurtasun uhalarekin bakarrik eroatea baino askoz seguruagoa.

Captura de pantalla 2016-02-15 a las 10.49.18

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading