Quantcast
Guraso.eus

UEUn gurasoentzako interesgarri izan daitezkeen ikastaroak

UEUk prest du dagoeneko udaberriko eskaintza eta tartean gurasoentzako interesgarriak izan daitezkeen ikastaroak ere badaude.

ON-LINE ESKAINTZA :

 

Erregeletak edo kolorezko zenbakiak George Cuisenaire-k asmatu zituen XX. mendeko berrogeiko hamarkadan. Iraslea eta musikoa zen. Urte asko eman zituen, musikaren didaktikan lanean eta hortik jasotako esperientziaz baliatuz kolorezko tira batzuk sortu zituen bere ikasleei musika erakusteko. Aukeratu zituen koloreak ongi pentsatutakoak ziren: gorriak, arrosak eta marroiak familia bat osatzen dute; horiak eta laranjak beste bat; berde argia, berde iluna eta urdinak beste familia batekoak dira; zuriak bere barne hartzen ditu beste kolore denak eta beste tira guztiak tira zuriz osa daitezke; beltza, kolorearen ukapena, ezin dugu beste tiren zenbaki zehatz baten funtzioan jarri.

Tira horiek egurrezko prismak bihurtu zituen eta ikasleen eskura jarri zituen. Laster konturatu zen kalkulurako zuten balioaz.

Erregeletek matematikek behar duten abstrakzioa lortzen lagunduko digute. Manipulatu (erregleten bitartez), irudikatu (bizi izan duguna adierazi) eta azkenik grafia.

Cuisenaire

Androzentrismoaren arabera antolatuta egonik, egungo hezkuntza-sistemak generoaren ikusmolde estereotipatua eta sexista transmititzen jarraitzen du. Izan ere, askotan irakasleek, eskolako langileek, ikasmaterialek, eskolaren antolaketak eta bestek, nahi gabe ere, oso barneratuta dauden generoari buruzko uste, balio eta ohitura sexistak transmititzen dituzte. Egoera hori aldatu eta hezkuntza-sisteman –eta bereziki ikasgelan- hezkidetza nola susta daitekeen azalduko da ikastaro honetan.

Sormena gizakiek ideiak, kontzeptuak, objektu berriak eta horien arteko loturak zein problema baterako soluzioak irudikatu, pentsatu eta sortzeko duten ahalmen psikosoziologikoa da, zein edozein giza alorraren aurrerapenerako elementu garrantzitsuena baita.

Ildo horretatik, ikastaroak hau proposatzen du: teknika berritzaileen bitartez, sormen-ahalmen hori garatu eta jorratu ahal izateko bideak zabaltzea. Bakoitzaren sormena izango dugu abiapuntu eta helmuga, bidean agertzen zaizkigun zailtasunak gaindituz jorratuko dugularik bidaia. Horrela, norberaren ezagutza pertsonaletik hasita, sormen-prozesuan parte hartzen duten ezinbesteko metodologia eta ezagupenak landuko ditugu betiere, esperimentazioa bide izango dugularik. Ikastaro honek norberaren eta ingurukoen sormena garatzeko oinarrizko tresnak eskaintzen ditu.

 

IKASGELAKO ESKAINTZA:

 

Ikertzaileen arabera, gaitasun emozionalak garatzeak ondorio positiboak ekartzen ditu ikaskuntza prozesuan, haurraren (eta helduaren) ongizatean, baita azken horrek bere bizitzan aurki ditzakeen oztopo eta arazoen prebentzioan ere. Eta hori posible ez denean, horiei aurre egiteko estrategia egoki eta osasungarriak garatzeko momentuan ere.

Gaur egun, hezkuntzaren helburu nagusia gizabanakoaren garapen integrala bultzatzea da. Hori, haurrak eduki akademikoak barneratzeaz harago doa, gaitasun emozionalak ere garatzen laguntzea eskatzen duelako. Horretarako hezitzaileak gai honi nola heldu eta nondik hasi lantzen pentsatu beharko du.

Irakasleak bere ikasleei adimen emozionala garatzen lagundu diezaien, nahitaezkoa da irakasle bakoitzak bere adimen emozionala lantzea, eta hori abiapuntutzat hartuta emozioen gaiari helduko diogu, bihotza eta burua bateratzen ikasten hasteko, eta eskolan ikasleoi beren gaitasun emozionalen garapenean nola lagundu ikasteko

Ukaezina da azken urteetan Informazio eta Komunikazio Teknologiek (IKT) jasan duten bilakaera eta horrek eragin duen aldaketa soziologikoa.

Une oro on-line egotearen beharra ez da garaiko moda bat. Internet ezinbesteko tresna bilakatu da, gure bizitzako ia alderdi guztietako parte izanik: kultura, komunikazioa, ekonomia, lan-esparrua eta banakako zein taldeko ohiturak. Ondorioz, gaur egungo gizartea hiperkonektatuta bizi da eta, heldu zein gazte izan, sarera erabat lotuta gaude.

Ostera, IKTen garapenaren abiadura azkarra bada, horien erabilera desegokiaren ondorio gisa jasan ditzakegun esperientzia negatiboen abiadura are azkarragoa da. Sareak baditu arriskuak, Interneten ibiltzeak gatazkak sor ditzaketen egoera arriskutsuak bizitzea eragin baitezake.

Adingabeen kasuan, Interneteko aroan jaio dira eta eurentzat Internet erabiltzea intuitiboa eta erraza izan ohi da. Edonola ere, sarean sortzen diren egoera arriskutsuen aurrean erantzuteko heldutasun eta irizpide falta dute.

Horregatik, familiek adingabeen errealitate digitala ezagutzea funtsezkoa da, familia Interneteko arriskuen prebentziorako gako baita. Beraz, ikastaroan adingabeek zein teknologia eta nola erabiltzen duten landuko da, horrek euren egunerokotasunean eta nortasun digitalean duen eragina aztertuz. Era berean, guztien artean funtsezkoa den taldeko hausnarketa kritikoa indartuko da.

child-192712_1280-640x480

Haurren garapen-prozesuan modu egokian laguntzeko eta lagun egiteko eskolaren nolakotasuna eta izaera errotik aldatu behar dira. Eskolak ukan beharreko ezaugarriak sakonki aztertuko ditugu formazioan zehar, modu teorikoan eta bibentzialean. Haurren prozesuan oztopoa izan beharrean bidelagun egokia izateak dakarren aldaketa ez baita teorikoki bakarrik ikasten eta jakiten ahal den zerbait, oso garrantzitsu deritzogu helduaren hausnarketa prozesuari eta bere buruan arakatzeko gaitasunari. Horretan laguntzeko ariketak izanen dira hortaz teorikoagoak izanen diren saioen osagarri. Eskolak nolakoa behar lukeen atalean eskola baten sortze-prozesuan kontuan hartu beharreko aldagaiak landuko ditugu banan-banan, praktikotasun osoarekin. Beraz, pedagogia aktiboari buruzko saio teorikoak, arlo bibentzialarekin eta eskola bat eratzeko beharrezkoa den informazio praktikoarekin batera joanen dira. Hilean behineko maiztasunarekin, etengabeko formazio-prozesuaren formatupean, hurrengo belaunaldien garapen-prozesuan lagundu nahi duen orok jakin beharreko ezinbesteko edukiak aurkituko ditu ikastaro iraunkor honetan.

Ikastaro honek haur eta gazte hauen ( bulba duten mutilak eta zakila duten neskak) gizarteratzean erantzunak eta formakuntza eskaintzen dizkie profesionalei, bai lanerako espazioetan, bai aisialdirako espazioetan erabilgarri izango zaizkienak.

Transexualitate-egoeran dauden adingabeko haur eta gazte hauek bizi duten egoera ulertzeko, ikastaroak ezagutza, erremintak eta estrategiak erakutsiko dizkigu.

Heriotza bizitzaren parte bat da. Hala ere, gaur egun heriotzaren gaia tabu bat da gure gizartean. Hori dela-eta, gai horren inguruko alderdi asko ilun samar izaten ditugu gure baitan, era horretan, haurrekin gai hau jorratzeko orduan, hainbat zalantza agertu ohi zaizkigu: zer ulertzen dute haurrek heriotzaz? Zelan hitz egin dezakegu haur batekin gai honen inguruan? Nola lagundu ahal diogu dolu-prozesu batean dagoen haur bati? eta abar.

Ikastaro honen bidez, galerak, heriotza eta dolua gaiei helduko diegu. Horretarako gure burua hobeto ezagutzea izango dugu abiapuntua, norberak galera eta doluen inguruan duen esperientziatik eta ezagutzatik, ilun dauden bazterrak argitzen saiatuz eta ondoren haurren galera eta dolu-prozesuak hobeto ulertu eta laguntzeko errekurtsoak aurkitzera eramango gaituen hausnarketa teoriko-praktikoa bultzatuko da, gai hau haurrekin nola jorratu aztertzeko xedearekin.

índice

Urte hauetan, esperientziaren ostean, Psikomotrizitate Hezkuntza Praktikak gizakiaren sakontasuna bere hartzen duela konprobatu dut. Era berean, gure txikiek maite eta disfrutatzen duten espazioa izanik.

Mugitzeko askatasuna duten errespetuzko eta zaindutako espazioak, edonorentzako elikagai nutritiboa dira, baina oraindik ere gehiago garapen psikologiko, motore, sentsorial eta emozionalean daudenentzat.

Modurik sinpleenean esanda, mugimenduaren eta psikismoaren arteko erlazioa azaltzen duen terminoa da psikomotrizitatea.

Orduan, zer da Psikomotrizitate Hezkuntza Praktika?

Psikomotrizitatea gorputzaren mugimenduaren bidez haurraren garapenean arreta jartzeko tresna da. Praktika honen berezitasuna eta originaltasuna hurrengo puntuetan oinarritzen da: oinarri teorikoa, helburu propioak, saio bakoitzeko pedagogia zehatza eta praktikarako teknika zehatza.

Izena emateko epea irekita dago, beraz, interesa izanez gero, sartu ikastaroan eta bertan aurkituko dituzu xehetasun guztiak eta baita matrikula egiteko aukera ere.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading