Quantcast
Guraso.eus

Oporretako jolas gomendioak

Astebete eskas geratzen da, ofizialki uda izateko. Eta dageneko, denok gaude desiatzen zelaian, hondartzan, mendian edota errekan momentu atseginak igarotzeko. Oporrak datoz! Urte luzean zehar horrenbeste desiratutako momentua.

Atseginez eta dibertsioz igarotzen dugun sasoia izan ohi da eta baita, haur zein helduok gure formalidadeak alde batera utzi eta bizitzari ikuspegi ludikoagoaz begiratzeko momentua. Ea ba, aurtengoan ere holaxe den.

Gaurko artikuluan, opor sasoi honetarako autorako edota opor momenturako aholku sorta batekin nator. Ea gustuko dituzuen eta baliagarriak zaizkizuen.
Ondo pasa udaldia eta batez ere, jolastu, amestu, dibertitu eta gozatu!

Autoan bidaiatzerako orduan zer?
Oporretara goazenean sarri, kotxean ordu dezente egitea tokatzen zaigu. Eta ordu horiei izaera ludikoa emanez gero, eramangarriagoa izan daiteke bidaia eta oporraldiaren hasiera bera. Hona hemen momentu luuuuzeee hori laburtzeko autoan egin ditzakegun jolas gomendioak:

juegos-ninos-coche
1.- Ikusi makusi: Jolas klasikoa. “Ikusi makusi, zer ikusi? Gauzatxo bat, gauzatxo bat… hasten dena hasten dena… a hizkiarekin”. Jolasean ikusten ditugun gauzak sartzeaz gain, nahi izanez gero, gai konkretu batera mugatu dezakegu. Adibidez; marrazki bizidunetako pertsonaiak, animaliak, mendiak etab.

2.- Aurkikuntzen sakua: Oihalezko saku batean egunerokotasunean eta eskura ditugun bost elementu sartuko ditugu, adibidez: ileko goma, platanoa, orrazia, harri bat, panpina, kotxea, arrama, eraztuna… Objektu hauek sakuan sartu baino lehen, erakutsi eta izendatu egingo ditugu. Ondoren, eskua sakuan sartuta eta begiak itxita, eskuarekin hartu dugun objektua zein den asmatzen saiatu beharko dugu.

3.- Koloreak asmatu: Jolas honek bi aldaera izan ditzake. 1. Aldaera: Kolore bat esan eta kolore hori duten 3 objektu izendatu beharko ditugu. Nahi izanez gero, gaia aldez aurretik mugatu dezakegu. Adibidez: Kolore txuriko hiru animalia esan. Animaliak eta janariak dira gairik arrakastatsuenak. 2. Aldaera: 3 objektu esan eta komunean duten kolorea asmatzen saiatzea da aldaera honen gakoa.

4.- Errima, bertso kanta eta hitz korapilatsuen jolasa:  Ahozkotasunarekin jolastea beti da dibertigarria. Hizkuntzaren aldaerak, aukerak eta hiztegia bera ezagutzeko aukera paregabea eskaintzen du. Hitzekin errima desberdinak egitera ausartu gaitezke edota ezagutzen ditugun bertso eta kantak abestera. Horretaz gain, bertso eta kanten moldaketak inprobisatu genitzake. Oso dibertigarriak dira hitz korapilatsuak asmatu edota ezagutzen ditugunak errepasatzea.

Comet PANSTARRS C/2011 L4 and the thin waxing Moon, March 12, 2013, over the Chiricahua Mountains, in Arizona, but seen from New Mexico, from a site on Highway 80 north of the Painted Pony Resort. A 2s exposure at f/2.8 and ISO 640 with the Canon 60Da and 135mm telephoto + 1.4x Extender.

Comet PANSTARRS C/2011 L4 and the thin waxing Moon, March 12, 2013, over the Chiricahua Mountains, in Arizona, but seen from New Mexico, from a site on Highway 80 north of the Painted Pony Resort. A 2s exposure at f/2.8 and ISO 640 with the Canon 60Da and 135mm telephoto + 1.4x Extender.

5.- Asmatzaileak gara!  Jolas honi esker, une batez bederen asmatzaileak bilakatuko gara. Egunerokotasunean erabiltzen dugun objektu bat esan behar dugu, adibidez… gerrikoa eta denon artean, gerrikoak izan ditzaken erabilerak esan beharko ditugu. Adibidez; gerrikoa izan daiteke txakurra lotzeko katea, arropak esekitzeko soka, elefantearen hortzak garbitzeko hortzetako haria etab. Momentu barregarriak, sortzaileak eta abstraktuak eskaini ditzakeen jolasa  izan daiteke.

6.- Zenbaketa jolasa:  Erronka desberdinak ezarri ditzakegu zenbaketa jolas honekin. Adibidez zenbatu ditzagun kolore horiko autoak, kopuru zehatz batera iritsi arte bidean ikusten ditugun behiak, animalia ezberdinak etab. Hamaika aukera eskaintzen dituen jolasa.

7.- Habanatik karga haundiko itsasontzia etorri da: Jolaskide batek itsasontzi horretan egon daitekeen objektu bat esan beharko du eta gainontzeko kideok, ezaugarri komuna duten objektuak esan beharko ditugu. Adibidez: “Habanatik karga handiko itsasontzia etorri da… frutaz betea… kolore berdeko frutak: Sagarra, mahatsa, madaria…”. Gainontzeko kideek ezaugarri horiek betetzen dituzten fruta berdeak izendatu beharko dituzte.

8.- Hitzen katea:  Autoko bidaiarien adinaren arabera jolasaren zailtasun maila moldatu genezake. Jolasaren helburua hitz ezberdinekin kate bat osatzea izango da. Kate horretan bi hitzen arteko hasiera eta amaiera berdina izan beharko da. Adibidez: Telefonoa, Oharkabean, Antzera, Ramon, Ontzia… Eta horrela guk nahi beste denboran.

9.- Kanta ezazu!: Jolas honetarako kide batek hitz bat esango du eta berehala, beste guztiok hitz hori duen abestia abestu beharko dugu. Adibidez: Ilargia. “Zuretzat Ilargia lapurtuko nuke gauero…”.

10.- Nor naiz ni?:  Pertsona batek beste pertsonaia, animalia edo objekturen bat pentsatu beharko du. Gainontzekoek galderak egingo dizkiote, berak pentsatutakoa asmatzeko helburuarekin. Galderek, bai edo ez erantzuna izango dute. Adibidez: Mirenek, elefantea pentsatu du. Animalia da? Basoan bizi da? Baserrian?… Eta horrela Mirenek pentsatutako animalia asmatu arte.

Eramango al ditugu oporretara jostailuak?
Beste aukera bat, etxean ditugun jostailuak oporretara eramatea izan ohi da. Baina erabaki honen aurrean arazo berdina izaten dugu ia guztiok, jostailuaren tamaina edo pisua ez dela egokia edonora eramateko. Horren alternatiba gisa, aukera egokia izan daiteke gustuko dugun jostailu horren moldaera egitea edota tamaina txikiagoko jostailua aukeratzea. Adibidez, etxean 3 marran mahai jolasa erabiltzen baldin badugu, harri txiki eta oihalezko saku batekin egin genezake jolasaren bertsio eramangarria.

baso_eskola
Nola jolastu genezake naturan?
Etxetik egituratutako jostailuak eramateaz gain, inguruak eskaintzen dizkigun erabilera anitzeko baliabideak erabili genitzake jolasak sortzeko. Nork ez du momentu atsegin bat igaro, arearekin, harriekin edota makilekin jolasten? Aprobetxatu ditzagun naturak eskaintzen dizkigun elementuak, gehitu sormen dosi bat eta et voilà… itzelezko jolas eta jostailuak sortzeko aukera izango dugu. Hori bai, kontuan izan naturak eskaintzen dizkigun baliabideak ezin ditugula edozein modutara erabili, ez da zuzena ezpata bat egiteko zuhaitz bati adar bat apurtzea. Aprobetxatu ditzagun lurrean edota lehortuta dauden baliabide naturalak. Eta erabili ondoren itzuli diezaiogun naturari berea dena, berak utzi digun moduan.

Itsaso Pagoaga

Kaixo denoi, Haur Hezkuntzako ikasketak egin izanagatik ez naiz irakasle. Aspalditik gehiago interesatu zait hezkuntza ez formaleko esparrua (eskolaz kanpokoa), hezkuntza formala baino. Jolasarekin erlazionatutako gaiak interesatzen zaizkit: jolasak, jostailuak, eskulanak, jolaserako espazioak, jolas ohiturak etab. Jolasteaz gain margotzea, musika ikus-entzutea, zinema eta literatura ere gustuko ditut. Ingurukoek diotenaren arabera, berba zalea eta umoretsua naiz. Guraso.com-eko leiho honetan ere jolasaren inguruan nire hausnarketa, ideia eta proposamenak zuekin partekatzen saiatuko naiz. Eta nola ez, noizean behin jolaserako gonbidapena ere luzatuko dut. Izan ere, ez al dago jolasean ondo pasatzea baino gauza atseginagorik? Itsaso Pagoaga Zaloña (Arrasate, 1985)

2 thoughts on “Oporretako jolas gomendioak

  1. Pingback: GURASOAK sos – Arrosa

  2. Pingback: Oporretan zoaz? Nola biziraun auto / tren bidaiari - ERA

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading