Quantcast
Guraso.eus

Neska-mutikoak ipuin kontaketan trebatzeak onura oso interesgarriak ditu

Eneko Haritza ipuin kontalari hondarribiarrak bi orduko saio egin zuen ostiralean Elgetako liburutegian. Zortzi urtetik gorakoentzako egin du lehenengo saioa, eta bost urtetik gorakoentzako egingo du bigarrena hurrengo ostiralean. Familian egiteko tailerra izango da azken hori.

Jolasaren bitartez ipuinak ondo kontatzeko hainbat teknika ikasi dituzte haurrek Elgetan. Gu ere kontalari izeneko dinamika dute martxan Gipuzkoako herri horretako liburutegian, eta tarteka haurrekin egindako ipuin kontalari saioak egiten dituzte. Hala, zaletasun hori duten neska-mutikoei oso ondo etorri zaie ipuin kontalari profesional batek emandako aholkuak eta trikimailuak.

“Umeak borobilean jarri eta hainbat teknika landu dituzte. Lehenik eta behin, Txanogorritxuren ipuina ahalik eta laburren kontatzeko ariketa egin dute, ideia nagusiak identifikatzeko asmoz. Ostean, ipuin bera askotariko emozioekin kontatzen hasi dira: oihuka, baxu-baxu, pozik, haserre…”, azaldu du Elgetako liburutegiko arduradun Geaxi Ezpeletak.

Hiztegia, oroimena, espresibitatea…

“Sarrera moduko bat izan da eta helburu nagusia umeek ondo pasatzea izan da. Elgetan oso giro aberatsa dago kontalaritzaren inguruan. Ikusten da gustatzen zaiela eta sustatzen dutela”, adierazi du Eneko Haritza ipuin kontalariak.

Argi du oso garrantzitsua dela umeei ipuinak kontatzea. “Hasteko eta behin gustatu egiten zaielako eta beste alde batetik behar dutelako; izan ere, ipuinak aberastu egiten ditu emozionalki. Gaur egun asko hitz egiten da adimen emozionalari buruz eta ipuinek emozio ezkorrak neutralizatzeko aukera bat eskaintzen dute umeei bideratutako ipuinak ondo amaitu ohi direlako. Barne mundua pizten eta zabaltzen du ipuinek. Sozializatzeko bideak ere erakusten dituzte ipuinek”.

Ipuinak entzutetik ipuinak kontatzera igarotzen badira gehiago aberasten da haurraren mundua. Hiztegia lantzen dute, istorio bat egituratzera eramaten ditu, oroimena lantzen dute, espresibitatea, jendaurrean ipintze hori…

Ohikoa izaten da adin batetik aurrera umeei ipuinak kontatzeari uztea. Eneko Haritzaren ustez bi arrazoi nagusi daude horretarako eta elkar lotuta daude: “Behin jarrita eta istorio onak badira guztiok entzuten ditugu ipuinak gustura, baina egia da koxkortzen diren heinean ipuinak txikientzako direla ikusten hasten direla haurrak. Ez dutenez beraien burua hain txiki ikusi nahi alboratu moduan egiten dituzte. Niretzat honek lotura zuzen du guk helduok ere horrela ikusten ditugula gauzak. Ipuinak haur txikientzako direla uste dugu orokorrean”.

Bost urtetik gorako neska-mutikoentzako egingo du Eneko Haritzak hurrengo tailerra Elgetan. “Egia esan ez dut inoiz horrelako tailerrik egin eta lehenengo aldia izango da niretzat. Familian egiteko tailerra izango da eta helburua betiko moduan neska-mutikoek ondo pasatzea izango da”, esan du.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading