Quantcast
Guraso.eus

Nerabeekin sexualitatea lantzeko, Mihi-Bero mahai-jolasa

Nerabezaroan sexualitatea lantzeko beharra zegoela ikusita, eta hori euskaraz lantzeko tresnarik ez zegoela kontuan hartuta, 2013an sortutako proba pilotu batetik sortu dute Arrasateko Txatxilipurdi elkartekoek, Mihi-Bero mahai-jolasa. 12 urtetik gorakoei zuzenduta dago eta taldeka jolastu daiteke.

Txatxilipurdik, sexualitatea berdintasunaren ikuspegitik lantzeko helburuz sortu du Mihi-Bero izeneko mahai-jolasa, eta noski euskaraz.

Jolasteko erraza

12 urtetik gorakoei dago zuzenduta, eta sexualitatea oinarri moduan hartuta, hainbat gai landu nahi izan dituzte mahai-jolasean. Halaxe azaldu dute elkarteko Haur saileko koordinatzaile Itsaso Gallastegik eta Gazte saileko kide Leire San Vicentek: “Mihi-Bero jolasarekin sexualitatea, berdintasuna edota feminismoa landu ditugu. Tabuak apurtu nahi izan ditugu, eduki desberdinak eta askotariko harremanak ukitzen dituen mahai-jolasarekin. Erreminta moduan ere erabil daiteke gai horiek lantzeko”.

Taldeka jolastea proposatzen dute egileek eta Trivial jokoaren antzerako funtzionamendua dauka: “Mahai-jolas honek taula bat dauka eta hainbat laukitan jar daiteke parte-hartzailea: imintzioka edo mimika laukia dago, baita marrazkiarena ere, galderena, eta azkenik, hitz ezkutuarena”, esan du Gallastegik.

Dagoeneko salgai

Mahai-jokoaren inguruko informazio gehiagorako, webgune bat ere egin dute Txatxilipurdikoek. Bertan irakur daitezke jolasaren nondik norakoak edota bestelako xehetasunak.

Dagoeneko 25 euroren truke salgai jarri dute Txatxilipurdiko egoitzan. Internet bitartez eurekin harremanetan jarrita ere eros daiteke, eta momentuz, baita Arrasateko Olgeta dendan ere.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading