Quantcast

Maialen Beltran (Ikasgela Ibiltariak): “Onartu beharra dugu natibo digitalen aroan gaudela”

Gipuzkoako hainbat herri bisitatutako ditu uztailean zehar Ikasgela Ibiltariak izeneko autobusak. Gipuzkoako Foru Aldundiak eta Orona Fundazioak bultzatutako ekimena da eta Kode_Eskolaren barruan kokatzen da. Helburua da gazte gipuzkoarrak programazioaren mundura gerturatzeko.

Programazioaren ikaskuntzaren bitartez lehen adinetan —8-16 urte— dauden haurren eta gazteen artean teknologien erabilera egokia eta sortzailea bultzatzeko helburuarekin abiarazi zuten Ikasgela Ibiltaria. Ekainaren 28an eman zioten hasiera abenturari Donostian, eta uztailaren 30era bitartean Gipuzkoako hainbat herritan izango da autobusa.

Teknologiaren aldeko jakin-mina eta bokazioa sustatu gura dituzte, eta 8-16 urte bitarteko gazteei sei ikastaro edo tailer eskaintzen dizkiete bi hezitzailek. “45 minutuko saioak izaten dira, eta normalean ez dago aurrez izena eman beharrik. Batzuetan taldeak ditugu hitzartuta, baina ez beti”, adierazi du Maialen Beltran hezitzaileak. “Kode-Eskolaren barruan dago Ikasgela Ibiltaria. Eskaintzen ditugun tailerrak dira Scratch, Game Maker, webguneak sortzeko tailerra, programazioa ordenagailurik gabe, programazioa I eta programazioa II”.

Beltranek azaldu du Scratch tailerra 8-12 urte bitarteko neska-mutikoei dagoela bideratuta. “Irudiekin programatzen ikas daiteke eta jolas txikiak programatzen ikasten dute umeek. Asko erabiltzen ari dira eskoletan haurrak programazioaren munduan sartzeko”.

Game Maker oinarrizko bideo-jokoak programatzeko erreminta da. “12-16 urte bitarteko neska-mutikoentzako egiten dugu logika eta matematika nozio batzuk eskatzen dituelako. Webguneak sortzeko tailerrean, berriz, bakoitzak bere webgunea sortzen du: izena ipintzen dio eta argazkitxo batzuk ere bai. HTML hizkuntzarekin egiten dugu”.

Ordenagailurik gabeko programazioa ere egiten dute. “Denbora pasa batzuen bitartez ordenagailuaren logika apur bat ulertzen saiatzen gara. Pixelen bidezko marrazki batzuk egiten ditugu, eta lantzen ditugu irudimena eta logika matematikoa”, esan du Beltranek. Gazteen heldutasun mailaren arabera programazio saioak ere eskaintzen dituzte: bi maila daude.

Gurasoentzako mezua

Programazioarekin edo robotikarekin lotutako ikastaroak oso modan daude. “Teknologia gure bizitan dago eta barrutik apur bat ezagutzen baditugu hobeto. Askotan alde negatiboa ikusten dugu eta badituzte, batez ere ondo erabiltzen ez baditugu. Baina ezagutzen baditugu erabil ditzakegu gure onurarako eta gauza asko lor daitezke”, adierazi du Beltranek.

Guraso batzuk ezjakinak dira teknologia kontuetan. “Esan daiteke haur asko mugikorra esku artean dutela jaiotzen direla gaur egun. Natibo digitalen aroa da. Programazioak sormen eta bokazio teknologikoak sustatzen ditu. Teknologia oso egokia da logika matematikoa, irudimena edo talde lana lantzeko. Hizkuntza formulak ikasita, zehatzago hitz egin eta pentsatu ahal izango dute haurrek problema konplexuei buruz. Programatuz, pentsatzen ikasten dute. Eta programazioa oinarrizko gaitasuna izango da etorkizuneko lanpostuetan. Erreminta oso ona izan daiteke”.

 

 

 

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading