Quantcast
Guraso.eus

Leire Etxezarraga: “Erditu osteko bakardade sentimendu hori landu daiteke”

Leire Etxezarraga gizarte hezitzailea, pedagogoa, Gestalt terapeuta eta hiru umeren ama da. Erditu berriak diren emakumeentzako talde dinamikak egiten ditu une oso sentibera eta garrantzitsua delako. Amatasunaren intelektualizazioaz mesfidatzeko dio. Oso garrantzitsua da inguruan dugun informazioa jasotzea, baina zer garen ahaztu gabe eta senarengandik zein emozioengandik datorkiguna baztertu gabe.

 

“Nire esperientziatik abiatuta erditu osteko lehenengo uneak gogorrak dira. Niretzat gogorrak izan ziren lehenengo umea erditu osteko lehenengo une horiek. Hala, erabaki nuen landu beharreko zerbait dela eta beste ama batzuei laguntzeko aukera dagoela”, adierazten du Etxezarragak.

Bakardade sentimendua

Etxezarragak bakardade sentimendua du gogoan. “Ni oso bakarrik sentitu nintzen eta une oso gogorra izan zen. Bakardadea ez da bakarrik fisikoa. Inguratuta egonda ere bakarrik sentitzea posible da, eta uste dut erditu berriak diren emakumeen artean oso orokorra dela. Beste ama batzuekin hitz eginda ikusi dut hori, eta beharrezko ikusi dut lantzea”.

Gestalt terapeutaren hitzetan erditu osteko amek izaten duten sentimendu bat da bakardadea. “Egia da beste une askotan ere eman daitekela, baina ama asko sentitzen gara bakarrik erditu ostean eta askotan ez dakigu sentimendu hori adierazten gertu dugun horrek uler dezan zer gertatzen zaigun. Bikotekidea izan dezakezu, baina bizipenak desberdinak dira eta ez ulertuak egoten dira. Horrek ere bakartasun batera eramaten zaitu”.

Hala, erditu berriak diren emakumeak elkartzeko espazioak sortu behar zirela ikusi zuen Etxezarragak eta horretan dihardu. “Beste ama batzuk ulertzen dutelako zuk zer sentitzen duzun eta parte-hartzaileek ikusteko sentitzen duten hori ez dela hain arraroa”. Barruak askatzeko espazioak direla adierazten du; izan ere, erditu osteko une horretan emozioak gora eta behera egiten dute. Talde terapia dela esan daiteke.

Adituak argi du amak ondo egon behar duela eta ulertu behar duela nondik datozen dituen sentimendu eta kezka horiek.

Amatasunaren intelektualizazioa eta kanpoko presioak

Etxezarragaren ustez kanpotik jasotzen diren presioak identifikatzen jakitea garrantzitsua da. “Taldeetan asko hitz egiten da horretaz. Kaletik zoaz eta edozeinek dauka baimen berezi moduko bat esateko gauzak ez dituzula ondo egin. Badirudi mundu guztiaren begiradapean gaudela eta ama onak/txarrak garen zaintzen dagoela mundua. Horrek guztiak gurekiko exigentzia maila handitu egiten du eta gure burua zorrotz epaitzera eramaten gaitu”.

Amatasunaren intelektualizazioaz ere ohartarazten du terapeuta. “Liburu pila daude gaur egun, baina horrek nire ustez norberaren esentziatik apur bat urrundu egiten gaitu. Konturatu behar dugu ezer jakin gabe ere ama izan gaitezkela berdin-berdin. Sena, emozioa… horrek ere eramango gaitu hezkuntza oso egoki batera”.

Ondo dago liburuetan jasota dagoena irakurtzea Etxezarragaren ustez.  “Horrek burua zabaldu egiten digu, baina ezin dugu gure sena galdu. Oso aberasgarria da baita ere gure burua ondo ezagutzea eta noski kontaktua umearekin. Dagoenarekin egin behar dugu aurrera, garen ama horrekin eta ez izan nahi dugun ama horrekin”.

Leire txezarragarekin elkarrizketa entzungai.


 

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading