Quantcast

‘Jira bueltan’: aurreko belaunaldiei jasotako kantuak eta jolasak

Aretxabaletako, Eskoriatzako, Eibarko eta Elgoibarko Udalek Jira bueltan bilduma egin dute  elkarlanean eta neska-mutikoen artean banatu dute aurreko belaunaldiei jasotako kantuak eta jolasak berreskuratzeko eta biziberritzeko helburuarekin. Badihardugu euskara elkartearen Ahotsak.eus proiektuaren barruan garatu dute bilduma berria.

Jira bueltan liburuxka-DVDan jaso dituzte 14 jolas, 30 kanta-jolas eta 7 abesti. 12 urte arteko neska-mutikoentzako gertatu dute, batez ere 4 eta 10 urte artekoentzako. Umeekin jolastu gura duten guraso, irakasle eta hezitzaileendako ere oso aproposa dela iragarri dute horren sustatzaileek.

Ahotsak.eus proiektuaren barruan

Badihardugu euskara elkartearen Ahotsak.eus proiektuaren barruan garatu dute bilduma berria. Proiektu hori ahozko ondarea jaso eta zabaltzeko sortu zen, eta bereziki, adinekoen testigantzak jasotzen dituzte, bideoan. Jasotako ondarea ikasgeletara eramateko asmoarekin, 2011. urtean hezkuntzako proiektua jarri zuten abian, hainbat udaletan. Eta Jira bueltan horren emaitza da.

Eibar, Elgoibar, Eskoriatza eta Aretxabaletako bederatzi ikastetxetako 300 haur baino gehiagok hartu dute parte, Haur Hezkuntzakoak zein Lehen Hezkuntzakoak. Ondoren, Badihardugu elkartekoek umeak kantuan eta jolasean grabatu dituzte, eta ikus-entzunezkoak sortu, adinekoen eta umeen grabazioak batuta. 51 kanta eta jolas landu dituzte guztira, eta adineko 60 lekuko baino gehiagoren testigantzetan oinarrituta.

Eider Eibarren marrazkiak

Liburuxkan, kantuen eta jolasen letrak eta azalpenak datoz, diseinu koloretsuarekin eta hainbat irudirekin: ikastetxeetan egindako grabazioen fotogramak eta Eider Eibar marrazkilariak egindako marrazkiak. DVDan, berriz, kanta eta jolasen bideoak.

Durangoko azokan, aurkeztuko dute abenduaren 8an, Saguganbara aretoan (17:30). Eta Eider Eibar marrazkilaria bertan izango da.

Azokan bertan egongo da salgai, Badihardugu euskara elkartearen stand-ean. Gainera, liburuxka-DVDan datozen kanta eta jolas guztiak Ahotsak Ikasgelan webgunean ere jarri dituzte, herritar guztien eskura Ahotsak.eus-en.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading