Ipuin parekideen gaineko online ikastaroa abiaraziko dute Kalaka komunikazio agentziatik ostiralean. Oinarrizko informazioa emango dute, eta gerora solasaldia sortzeko Facebook taldea ere sortuko dutela adierazi dute. Pozik daude eskaintzak izandako harrerarekin. Argi dute gaia garrantzitsua dela, eta interesa pizten duela. 

Hezkuntza munduko profesionalek, magisteritza ikasleek, gurasoak… eman dute izena ipuin parekideen inguruko lehenengo online ikastarorako. “Ikastaro presentzialak egin izan ditugu baina uste dugu online ere egin daitekeela eta urratsa ematea erabaki dugu”, adierazi du agentziako kide Ilazki Gainzak.

Kalakako profesionalek argi dute jendarte desberdin bat eraikitzeko parekidetasuna kontuan hartu behar dela baita ere ipuinak aukeratzerakoan. “Ipuinen bitartez balore asko transmititzen ditugu. Bideo-jokoetan indarkeria saihestu behar dela ulertu dugun moduan ulertu behar dugu haurrei kontatzen dizkiegun ipuinetan parekidetasunari ere erreparatu behar diogula. Neskek zein mutilek ikusi behar dute aukera berdinak izan ditzaketela, eta errespetu berdina merezi dutela. Ipuinak modu oso egokia dira hori transmititzeko”.

Kalakatik ziurtatzen dute ipuin parekideak badaudela. “Uste duguna baino gehiago daude. Gidak daude, ipuinak daude, editorialak daude… Gero eta gehiago dira ipuin parekideak lantzen dituzten idazleak eta argitaletxeak”. Uste dute hezitzaileek tresnak behar dituztela ipuinak identifikatzeko, hau da sexistak edo parekideak diren antzemateko… “Tresna horien berri badugu errazagoa da material egokia aurkitzea. Helduen liburuekin berdina gertatzen da. Idazle bat ezagutzen badugu eta zein ikuspegi duen antzematen badugu gutxi gorabehera badakigu nondik nora joko duen”.

Gainzak uste du ipuin sexistak ere bilaka ditzakegula parekide. “Etxean baditugu ez ditugu denak zaborrontzira bota behar. Balore matxistak transmititzen dituztela konturatzen bagara beti dago aukera moldatzeko”. 

Ahalduntzen joatea

Kalakako arduradunek uste dute gaiarekiko gero eta sentsibilitate handiagoa dagoela. “Eguneroko lanean ikusten dugu hori. Gertatzen dena da askotan jendeak ez dakiela nola egin aldaketa. Parekidetasunaren alde daude baina ezezagutza handia dago. Erremintak falta direla uste dugu”, adierazi du Gainzak. “Hainbat erakundetik bultzatzen da berdintasuna gaur egun, baina norbanakoek nola eragin dezakete? Argi dago norberaren esku dagoela neurri handi batean eta gauza txikietan dago aldaketa. Uste dugu lor daitekeela”.

 

 

 

 

 

Ez da hutsala ipuin bat aukeratzea. “Uste duguna baino askoz ere garrantzitsuagoa da. Azkenean ikuspegi bat, balore batzuk transmititzen dizkiegu haurrei ipuinen bitartez, eta hori beraien mundua eraikitzen ari diren une batean”. Disney da akaso kasu aipagarriena Gainzaren esanetan. “Printzesa ahulak eta mutil indartsuak dira gehienetan. Mutilek armak erabiltzen dituzte eta neskak mutilen zain daude. Neska-mutikoak oso txikitatik hasten badira horrelako edukiak barneratzen horren arabera doaz egituratzen. Akaso, helduaroan konturatuko dira hori aldatu egin behar dela, baina txikitatik hasita baino askoz ere lan handiagoa da. Jendarte parekideago baten alde egingo duten baloreak txikitatik transmititzea bada gakoetako bat”.

Komunikazio parekidean oinarritutako agentzia da Kalaka. Bi emakumek sortu dute eta komunikazioa eta parekidetasuna dituzte lan hildo nagusiak. Diseinu grafikoa, komunikazio estrategiak, ikus-entzunezkoak… sortzen eta bideratzen dituzte, eta aholkularitza zein formakuntza zerbitzuak ere eskaintzen dituzte. “Gure ustez formazioa da sentsibilizatzeko modu egokiena”, adierazi dute.