Quantcast
Guraso.eus

Ikerketa berria haurrekin bidaiatzeko euste-sistemen inguruan

Zirkulazio istripua da heriotza arrazoi nagusia 14 urtetik beherako neska-mutikoen artean. Garrantzitsua da —eta derrigorrezkoa— homologatutako euste-sistemak erabiltzea ibilgailuan doazenean. %75 jaisten dute heriotza tasa, eta %90 lesioak.

Captura de pantalla 2016-07-04 a las 12.37.33

Ibilgailuan doazen umeentzako euste-sistemen inguruan ikerketa bat egin berri du OCU elkarteak —Organización de Consumidores y Usuarios—. Merkatuan dauden 36 aulki aztertu dituzte eta ikerketa konparatiboa egin dute. Radio Euskadiko Consumidores saioan eman ditu xehetasunak OCU elkarteko Enrique Garciak.

Ikerketan merkatuan dauden 36 aulki aztertu dituzte. Guztiak daude homologatuta, beraz guztiek betetzen dituzte legeak ezartzen dituen segurtasun neurriak. OCU elkarteak, ordea, proba bereziak egin dizkie 36 aulki horiei, tartean alboko inpaktua deritzona. “Esan beharra dago, orokorrean, aulkien segurtasun maila egokia dela. Onak dira. Garrantzitsua, hemen, aulkien artean aukeratzea da haurraren ezaugarriak eta aulkiaren prezioa kontuan hartuta”, azaldu du Enrique Garciak.

Bi araudi indarrean

OCU elkarteko ordezkariak azaldu du gaur egun bi araudi daudela indarrean: 44/04 araudia zeinek haurrak pisuaren arabera sailkatzen dituen eta kategoriak dira 0, 0+, 1, 2 eta 3; eta  R-129 edo i-Size araudia zein berriagoa den eta aulkiak homologazio prozesu zorrotzago batera ezartzen dituen. “Aulkia aukeratzerakoan gurasoek argitu behar duten lehenengo gauza da zein kategoriakoa behar duen, eta umearen ezaugarriak hartu behar dituzte horretarako kontuan. Umeak handitu egiten dira, eta litekeena da haurtzaroan zehar bi eta hiru aulki artean behar izatea”.

Ezaugarri erabakigarriak

OCU elkarteak hainbat ezaugarri hartu ditu kontuan aulkiak baloratzerakoan: segurtasuna (garrantzitsuena), erabilera erraza, ergonomia, eta autoan hartzen duen lekua. “Ezaugarri horiekin balorazio bat egin dugu. Gero, prezioa hartu dugu kontuan, eta horrek kalifikazio orokor bat eman digu. Ondo aukeratuz gero posible da ibilgailurako aulkia erosterakoan 150 euro aurreztea”, dio Garciak.

OCU elkarteko ordezkariak gaineratu du komeni dela erosi aurretik aulkia ibilgailuan probatzea, gehienbat zenbat leku hartzen duen ikusteko. Kontuan hartu behar da baita ere ipintzea erraza edo zaila den, zein materialarekin eginda dagoen eta erraza den garbitzeko.

Azken oharra: “Kontuan hartu euste-sistema erabiltzea derrigorrezkoa dela. Edozein aulki da hobea haurra euste-sistemarik gabe eramatea baino”.

Ikerketa konparatiboa kontsultatzeko hemen.

Elkarrizketa hemen entzungai (23. min. – gazteleraz)

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading