Quantcast
Guraso.eus

Gabonetako opariak aukeratzeko 4 arauak

Azkenean iritsi da egutegiko azken orria, abendua. Eta horrekin batera, etxeko txikienentzako urteko sasoirik magikoena. Gabonak.

Neuk ere, txikitako gabonen oroitzapen goxoak ditut. Etxeko mahaian elkarrekin elkartu, bapo jan, barre egin, berriketaldi luzeak (eta guretzako asperdura une luuuzeak) igarotzen genitueneko sasoiak ziren horiexek… Baina batez ere, irrikaz gogoratzen dudan momentua, oparien momentua da. Desiatzen egoten nintzen/ginen, bakoitzak bere oparia zabaltzeko. Zer ote, zer ote? Hura momentua! Hasiera batean, Olentzeroren magia bizirik zegoela, inoiz ez genekien zer opari jasoko genuen baina, hazi ahala, jakin genuen Olentzero gurasoak zirela. Momentu hartatik aurrera, oparien artean bat amonak egindakoa zela banekin eta ondo jakin ere, opari paperean batutakoa liburu bat izango zela.

Gaurkoan, akordura ekarri gura dut etxeko amonak, Modesta zenak, nola aukeratu eta erosten zituen bere 13 bilobentzako opariak. Bitxia bezain interesgarria iruditzen baitzait.

13 biloba izanik, amonak nahiko garbi izaten zuen opariak nola egin. Aise egin ere!Horretarako, sasoi batean Arrasaten zegoen Hire liburudendara joaten zen eta Piliren (bertako ugazaba) laguntzarekin biloba bakoitzarentzat liburu bat aukeratzen zuen amonak. Urteren batean lagundu nion (koxkortuago nintzela) errekadu horiek egitera eta izugarria iruditzen zitzaidan. Amonak biloba bakoitzaren adina esan eta Pilik, adin horretarako egokia zen euskarazko liburu bat gomendatzen zion. Amonak buruarekin baietz esan eta aurrera… horrela 13 liburuak aukeratu arte. Denak opari paperan txukun batu, bakoitzari izena ipini eta listo. Prest zeuden etxeko txikientzako opari guztiak. Di-da!

Amonarekin gabonak familian pasatzen. Argazkia: Itsaso Pagoaga

Erraza dirudien ariketa hau, gaur eguneko guraso eta aitona-amonentzako buruhauste handi xamarra dela dirudi. Zer oparitu haurrari gabonetan? Zenbat oparitu? Uste dut, sarri helduok, erraza dirudien hori konplikatzeko abilidade berezia dugula.

Amonaren esperientzia hori aintzat hartuta gaurkoan gabon hauetarako baliagarriak izan daitezkeen lau arau proposatu nahi dizkizuet. Edo hobe esanda, lau opari aukeratzeko irizpideak eskaini nahi dizkizuet. Gabonetarako, zein urteko beste sasoi bereziren batentzako. Horra hor zerrenda:

  1. Oparia: izan dadila haurrak eguneroko bizitzarako behar duen zerbait: oinetakoak, lotarako sakua ibilaldirako, osagarriren bat…
  2. Oparia: Irakurketarekin erlazionatutakoa. Liburua, komikia, ebook-a….
  3. Oparia: Haurrak ikaragarri nahi duen objekturen bat izatea; jostailua, patinak, baloia… Bere desira asetzeko asmoz.
  4. Oparia: Familian gozatzeko zerbait; mahai jolasa, txangoa, esperientzia bat… Denok elkarrekin gozamen une bat pasarazteko helburua duena.

Uste dut lau arauen zerrenda hau aplikatzea ez dela oso zaila eta sasoi honetan sortzen zaizkigun hainbat buruhauste, urduritasun, presio etab. Ekiditeko lagungarria izan daitekeela.

Baina horretaz gain, bada aplikagarria den beste arau edo ezaugarri bat eta amonaren esperientzian oso presente dagoena. Herrian bertan erostea. Zerbait erosi beharra baldin badaukagu behintzat. Konfiantza, ezagutza, gertutasuna… transmititzen dizkigute herriko dendek eta bertako ugazaba zein langileek. Hori da behintzat gure amonak Hire-ko Pilirekin sentitzen zuena.

Ea ba, aurtengo gabonetan ere, opariak zabaltzeko une hori momentu atsegin eta magiko bihurtzen den eta gozatzeko, barre egiteko, goxo eta lasai egoteko balio digun. Azken finean, horixe baita helburua, maite ditugun horiekin lasai eta goxo egotea. Gozatu dazazuela familian. Hurrengo arte

Itsaso Pagoaga

Kaixo denoi, Haur Hezkuntzako ikasketak egin izanagatik ez naiz irakasle. Aspalditik gehiago interesatu zait hezkuntza ez formaleko esparrua (eskolaz kanpokoa), hezkuntza formala baino. Jolasarekin erlazionatutako gaiak interesatzen zaizkit: jolasak, jostailuak, eskulanak, jolaserako espazioak, jolas ohiturak etab. Jolasteaz gain margotzea, musika ikus-entzutea, zinema eta literatura ere gustuko ditut. Ingurukoek diotenaren arabera, berba zalea eta umoretsua naiz. Guraso.com-eko leiho honetan ere jolasaren inguruan nire hausnarketa, ideia eta proposamenak zuekin partekatzen saiatuko naiz. Eta nola ez, noizean behin jolaserako gonbidapena ere luzatuko dut. Izan ere, ez al dago jolasean ondo pasatzea baino gauza atseginagorik? Itsaso Pagoaga Zaloña (Arrasate, 1985)

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading