‘Euskal pertsona-izenak’ aplikazioa garatu du Batura Mobile enpresak Androiderako eta iOSerako
Ane, Mikel, Zihara edo Sustrai; zein izen jarri laster jaioko den umetxoari? Ez da erabaki samurra, eta bai garrantzitsua. Horregatik, askok liburuetara eta Internetera jo izan dute laguntza bila.
Zer esan nahi ote du Abenek? Eta non ote dago Enaitz? Bada, orain samurragoa izango da bilaketa hori egitea. Bilboko Batura Mobile enpresak Euskal pertsona-izenak aplikazioa sortu du telefonorako, Bizkaiko Foru Aldundiaren laguntzarekin.
Izena Google Mapsen kokatu
“Debalde eskura daiteke eta Androiderako eta iOSerako garatu dugu”, halaxe jakinarazi du Gotzon Artzelus bergararrak, Batura Mobile enpresako arduradunak.
Euskaltzaindiaren irizpideen arabera zerrendatu dituzte izenak, sexua kontuan hartuta. Horrekin batera beste argibide batzuk ere ematen ditu aplikazioak: “Izenaren esanahia eta jatorria, esaterako”, dio. Gainera, aukeratutako izen hori mapan kokatzen du; Arrate izena Eibarren dagoela azaltzen du, adibidez. “Izen asko toponimia izenak dira gurean, eta horiek non dauden jakin genezake Google Mapsen kokatzen dituelako”.
Behin izenak begiratuta beti izaten dira batzuk gustukoago; hortaz, izen horiek hautatu eta automatikoki gustukoenen zerrenda sortuko du. Zerrenda hori, gero, lagunen edo senideen artean zabaltzeko aukera ematen du sare sozialen bitartez. Eta, bide batez, aplikazioaren erabiltzaileek aukeratutako izenik gustukoenen zerrenda egiten du.
Izenen zerrenda eginda ere batzuendako zaila da behin betiko erabakia hartzea, eta haiei laguntzen ere saiatzen da aplikazioa: “Joko bat dauka. Arrautza bat ageri da eta hari emanda aplikazioak berak proposatzen du izena”.
Laster euskal abizenak
Izena aukeratzeko aplikazioak ez dira berriak; izan ere, azkenaldian ugaritu egin dira ingelesez eta, batez ere, gazteleraz. Euskaraz, baina, ez zegoen halakorik orain arte. “Behar batetik sortu da, baina kuriositatea asetzeko ere balio du; izan ere, askok ez dakigu toponimia izena dugula eta zer esan nahi duen gure izenak”, argitu du Artzelusek. Gainera, Euskal izenekiko interesa Euskal Herritik kanpo ere zabalduta dagoela dio: “Kataluniatik kontsulta asko jasotzen ditu Euskaltzaindiak, eta Madril aldetik ere bai”.
Izenetan geratu barik Euskal abizenen aplikazioa sortzeko asmoa ere badute, urte bukaerarako, hain zuzen. “Abizenek oraindik interes handiagoa sor dezaketela uste dugu. Gure arbasoak Ameriketara eta beste leku askotara joan ziren eta euskal jatorriko abizen mordoa dago zabalduta. Hortaz, proiektuak beste dimentsio bat izango duelakoan gaude”.
Aplikazioa doan deskargatu daiteke hemen: