Quantcast

Euskal Herriko jolas parkeen gida martxan da: jolasparkeak.eus

Jolasparkeak.eus atarian bi espazio mota bereizten dituzte: jolas parkeak, alde batetik, horietan neska-mutikoentzako txirristak, kulunkak edo jolaserako antzerako estrukturak eskaintzen dituzten espazioak daude; eta bestetik, jolasguneak, horiek plaza bat, erreka bazter bat, lorategia edo baso ingurune bat izan daitezke, besteak beste.

Arrasaten aurkeztu dute Txatxilipurdik, Olgetak eta Goienak elkarlanean aurrera eraman duten Jolasparkeak.eus ataria. Tresna baliagarri izan nahi du Euskal Herriko jolasguneen eta jolas parkeen bilduma osatzeko. “Jolasguneak, jolaserako ere egokiak diren aire libreko espazioak dira. Hala nola; plazak, parkeak, frontoiak, kontzejupeak… Jolas parkeak, berriz, jolaserako espresuki sortutako parkeak dira”, azaldu du Olgetako Itsaso Pagoagak.
 
Izan ere, gaineratu du gaur egun Euskal Herrian ez zegoela halako gidarik eta irizpide batzuk kontuan hartuta ari dira osatzen Jolasparkeak.eus ataria. “Jolas parkea ahalik eta material naturalenekin egina izatea; jolas parkea osatzen duten elementuek motrizitatea, sormena eta haurraren abentura sena sustatzea; herrigintzatik abiatutako prozesuak izatea; doakoak izatea; estaliak izatea…”, adierazi du Pagoagak.
 
Hausnarketa baten ondorio izan da Jolasparkeak.eus proiektua. Txatxilipurdiko Lander Juaristik gaineratu du konturatu direla azken urtetan jolasera bideratutako oso jolas parke “antzekoak” egin direla, eta hauxe adierazi du: “Adituek eta arituek hainbat aldiz esan dute haurrek berezkoa duten jolaserako sena kamusten dutela patroi berdina erabiliz eraiki diren jolas parke hauek: partxis koloreko ziburuez, txirristez eta abarrez osatutakoak, alegia. Eta aldiz, arituek, hau da haurrek, behin eta berriz erakusten digute jolaserako edozein espazio dela egokia edo egitura berdinez ostatutako jolas parkeei beste erabilera bat ematen dietela”.

Arrasateko Monterron, esaterako, ez dago jolasera bideratuta, baina jolaserako hainbat aukera eskaintzen dituela argudiatuta, gidan sartu dute, adibidez.

Gaur egun, hamahiru gune gidan

Egun, gidak hamahiru gune jasotzen ditu. Euskal Herriko mapan kokatu dituzte eta bakoitzak fitxa bat dauka intereseko informazioa eta argazkiak jasotzen dituena.
 
Gida osatzen jarraituko dute; asmoa da hilean parke edo gune berri bat gehitzea, eta erabiltzaileei ere dei egin nahi izan diete prozesu horretan laguntzeko. Hauxe azaldu du Goienako Larraitz Zeberiok: “Erabiltzaileei ere dei egin nahi diegu prozesu honetan laguntzeko. Ziur dauzkagula etxetik gertu (edo ez hain gertu) gida honetan lekua merezi duten hainbat txoko. Proposatzeko gonbidapena luzatu nahi dugu. Jolasparkeak.eus atariak aukera ematen du horretarako. Nahikoa da lagunduiguzu jolas parkeen gida hau osatzen esteka klikatzea intereseko informazioa guri helarazteko.”.
 
Sare sozialak ere erabiliko dituzte. Facebook-en dagoeneko martxan dituzte talde bat eta orrialde bat, Jolasparkeak.eus izenarekin.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading