Quantcast

Bea Sever: “Bi seme ditut; nagusia zakilarekin jaio zen eta txikia bulbarekin” [BIDEOA]

Adin txikiko transexualen familiak elkartzen dituen Chrysallis Euskal Herria elkarteko kidea da Bea Sever. Sexologoa da eta horrekin batera bi umeren ama. Chrysallis Euskal Herria elkartea aurkezteko egiten dituen agerraldietan bere esperientziaren berri ematen du antzerako egoeran dauden familientzako lagungarri izango delakoan.

 

“Bi seme ditut; nagusia zakilarekin jaio zen eta txikia bulbarekin. Orain bi urte ez nekien ezer transexualitateari buruz, baina ume honek ekarri zigun etxera aniztasuna zer den eta normaltasuna zer den ikasteko lezio handia. Bota zuenetik lasaitu handia hartu du eta mutiko zoriontsua da. Gure bidea orduan hasi zen: jendeari azaldu, guk ulertu, semea laguntzeko borroka guztia, dolua gure buruarekin… prozesu hori guztia ez dena batere erraza”, adierazi du Severrek.

Chrysallis Euskal Herri elkarteko familiek badituzte aldarrikapen nagusi batzuk. Hiru nabarmendu ditu Severrek. “Alde batetik Eusko Jaurlaritzari eskatzen diogu familientzako arreta zerbitzu bat jartzea Nafarroan azarotik aurrera jarri duten bezalakoa. Bestetik, osasun arloan gure haurren tratamendua endokrino baten tratamendua besterik ez izanik —hormonak— eskatzen dugu psikiatria arlotik ateratzeko. Ez dadila egon psikiatra bat prozesu guztia zuzentzen. Azkenik, eskatzen dugu hezkuntza protokolo bat egotea transexualitate egoerak dauden eskoletan eta irakasleek eta langileek formakuntza jasotzea”.

Hazten doan elkartea

Chrysallis Euskal Herria elkartea 2015ean sortu zuten zortzi familiarekin. Egun, 40 familiak osatzen dute. Handitzen doan elkartea da eta apurka-apurka bere helburuak betetzen doa. Dena den, lege aldetik gabezia handiak daudela azaldu du Severrek. 

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading