Autoan, haurrek martxaren kontra bidaiatu beharko lukete gutxienez lau urte bete arte

Berriki egindako neurketek adierazten dute umeek martxaren kontra bidaiatzen badute nabarmen jaisten dela kalte larrien arriskua istripu egoeretan; %80, hain zuzen ere. Oraindik ere, gurean, aurrera begira bidaiatzen dute haur gehienek, baina Europa Iparraldeko herri gehienetan oso bestelakoa da egoera.

Hainbat erakundek dihardute gai honen inguruan kontzientziazio kanpainak egiten. Gomendatzen dute autoan bidaiatzeko umeak erabiliko duen aulkia erosterakoan ondo informatzeko, eta denbora eskaintzeko gaiari. Azpimarratzen dute gauza bat dela kaleko paseorako aulkia eta beste bat autoan bidaiatzeko aulkia. Batzuetan berdina erabiltzen dugu, eta akats larria izan daiteke.

Eskatu informazioa espezializatutako komertzioetan, eta ziurtatu gure autora ondo egokitzen den aulkia aukeratu dugula. Egokiak izan behar du baita ere gure umearen tamainarako.

Umearen buruaren tamaina

Auto istripu gehienetan talka aurretik edo albotik dator. Haur txikien burua handia da proportzioan gorputzaren tamainarekin. Hala, arazoa izaten da talkaren eraginez buruak aurrera egiten duela bat batean, eta umearen lepoko hezurdura zein gihar sistema ahulak izanik ezinezko zaiola indar bortitz horri eustea. Lesio larriak sor daitezke. A contra marcha webgunean azaltzen dutenez 50 kilometro orduko abiadura batean kilo bateko pisua 32 kilo bihurtzen dira. Hortaz, bederatzi kiloko ume bati buruz ari bagara —7-8 hilabete— eta haren buruak bi kiloko pisua badu talka egoeran lepoak 60 kiloko pisuari eutsi beharko lioke.

Haurrak martxaren kontra bidaiatzen badu eta kontuan hartuta talka gehienak aurretik edo albotik gertatzen direla umearen lepoak jasan behar duen indarra txikiagoa da, eta eusteko aukera handiagoa du aulkiaren bizkarraldeak egiten baitu tope.

Hainbat etxek egiten dituzte martxaren kontra bidaiatzeko aulkiak: Axkid, Klippan, Joie, ACM Besafe, Casual Play, Recaro, Römer, Cybex… Race erankundeak urtero egiten du autoan bidaiatzeko umeentzako aulkien gaineko azterketa. Hemen duzue 2016koa.

Argazkiaren iturria: hemen.