Elkarteak ezagutzen: Levántate contra el bullying (Iruña)

Jazarpen kasuekin arduratuta irabazi asmorik gabeko elkartea sortu du gazte talde batek Iruñan. Jazarpena pairatutako gazteak dira, eta badakite zertaz diharduten. Neurri eraginkorrak hartzea nahi dute eta horretarako dihardute lanean. Ez da nahikoa heriotza bat dagoenean gogoratzea.

Noiz eta zergatik sortu duzue elkartea?
Nafarroan bi lagunek egin zuten beren buruaz beste bi urte ez direla. 16 urteko neska bat eta 14 urteko mutil bat. Iruña inguruan kolpe latza izan zen, eta barruak astindu zizkigun. Baina konturatu ginen lagun taldean bi aste pasa ondoren ez zela inor gogoratzen. Lurperatzeetan hilerria beteta zegoen, baina bi egun pasa ostean gaia guztiz isildu zen. Garrantzitsua da sentsibilizazio lana, eta denok ikusten dugu beharrezko gazte bat hiltzen denean. Baina gero… Jazarpen kasuei oihartzun handia ematen zaie bateren bat hiltzen denean, baina gainerakoan ez dira existitzen. Min egiten digu horrek.

Zein helbururekin jaio zarete?
Jaio gara laguntzeko. Ikastetxeek, hezkuntza departamentuek… laguntza behar dute gai honi aurre egiteko. Eta jaio gara baita ere salatzeko. Ikusten badugu ez dela neurririk hartzen presio egingo dugu, presio soziala eta juridikoa.

Iruñako San Joan auzoan dugu egoitza, Monasterio de la Oliva kaleko 23. atarian. Webgunea dugu, baita ere Facebook, Twitter edo Instagram perfilak eta Youtube kanala.

Zein zerbitzu eskaintzen dituzue elkartetik?
Bi adar nagusi ditugu: aholkularitza psiko-pedagogikoa eta aholkularitza juridikoa. Jarduera asko antolatzen ditugu aholkularitza psiko-pedagogikoko alorretik. Helburua da jazarpen egoeran dauden biktimei eta haien gurasoei babesa eskaintzea. Antolatzen ditugu eskulan tailerrak, hitzaldiak… Eta izaten dira biktimentzako, gurasoentzako, ikastetxeentzako, irakasleentzako… Aholkularitza juridikoa da beharrezkoa duten familiei orientazio zerbitzua emateko.

Zuen sorrerak eragin handia izan du hedabideetan. Zergatik zure ustez?
Jazarpenaren aurka gazteek osatutako lehen elkartea gara Espainian. Gero, gure sorrerak bat egin du bere buruaz beste egin zuen Diego gaztearen kasuarekin. Gizarte honek ez daki jazarpen egoeratan zelan jokatu, eta ezer egin gabe gauden segundo bakoitza ikaragarria da sufritzen ari diren haur horientzako. Garrantzitsua da lehenbailehen neurriak hartzen hastea.

Izenari buruz bi hitz. Levántate contra el bullying edo Altxatu bullying-aren aurka. Ez gara altxatzen?
Hori da gure bekatu handiena, ez dugula denbora honetan ezer egin. Eta niri buruz ere ari naiz. Jazarpena da gauza bat ikusi izan dugunean beste alde batera begiratu duguna. Isildu egin gara. Horregatik daude hilerriak jazarpena pairatu duten gaztekin beteta. Gure elkartea sortu da ahotsa emateko hilerrian dauden gazte horiei guztiei. Hilerrian daude gizarte honek kasurik egin ez dielako. Eta, noski, gazte asko daude hilerrian amaitzeko arriskuan.

Ikastetxeetara ere joaten zarete ate joka. Nola hartzen dituzte zuen bisitak?
Gure proiektuaren berri eman nahi dugu eta azaldu nahi dugu zein zerbitzu eskaintzen ditugun. Ikastetxeek jakin behar dute ez dutela zertan jazarpen kasuak ezkutatu. Jazarpen kasu bat salatzeak ez du ikastetxearen irudia zikintzen. Kontrakoa esango nuke nik. Ikastetxeak ematen badu pausoa horrek erakusten du erantzukizunez dihardutela. Ez da horrela gertatzen eta gertatu beharko luke. Ikastetxeek esan beharko lukete: ikastetxean arazo bat dugu da, eta laguntza behar dugu. Hori da arduraz jokatzea.

Eta zein harrera egiten dizuete?
Ba denetik izan dugu. Leku batzuetan entzun dugu: “Nire ikastetxean ez da egon, ez dago eta ez da egongo jazarpen kasurik”.

Zeintzuk dira jazarpen egoeran dauden gazte batek dituen premia larrienak?
Normalean autoestimu arazo larriak dituzte. Jazarpenaren helburua, azken finean, hori da, autoestimua kaltetzea. Lehen premia, hortaz, laguntza psikologikoa jasotzea da. Eta gaiak okerrera egiten badu, aholkularitza juridikoa ere beharko du.