Getxoko Sendi proiektua: euskaraz familientzat eta familiekin
Getxoko Egizu elkartean badute gurasotasuna eta euskara uztartzen dituen proiektu interesgarri bat: Sendi proiektua. Azaroan bete ditu hamar urte. “Espazioak sortzen ditugu familia euskaldunek aukera izan dezaten euskara erabiltzeko, eta euskaldunak ez diren familiek aukera izan dezaten ikasteko”, azaltzen du Egizu elkarteko Lander Solozabalek. “Sendi proiektua sortu genuen ikusten genuelako Getxon aukera zegoela gauza asko egiteko, eta gainera beharra zegoela”.
Getxoko errealitatea
80.000 biztanle ditu Getxok, eta euskaldunak dira %30. Euskararen kale erabilera, berriz, %10 da. Getxok daukan beste ezaugarri bat da lau ikasletik batek A ereduan ikasten duela. “Kontuan hartuta gure errealitatea hori dela eta Algortan umeak dituzten familia gazte asko bizi dela saiatzen gara denendako moduko ekintzak antolatzen”, dio Solozabalek. “Jarduera ludikoak izaten dira gehienbat: tailerrak, hitzaldiak, ikastaroak… Ekintzari ematen diogu garrantzia, eta euskaraz dira”.
Arrakasta handia duten ekintzak izan ohi dira, doan gehien gehienak eta ezin iritsi ibiltzen dira Egizu elkartean. Eskaera, gainera, gero eta handiagoa dela diote. “Gustatzen zaigu formatu txikia lantzea arreta zaintzeko. Gabiltza dagoen eskaerari ezin erantzun”.
Familientzako tailerrak
Hasiera batean —orain hamar urte— umeentzako tailerrak eta gurasoentzako tailerrak antolatzen zituzten Egizu elkartean. Orain, ordea, familientzako tailerrak egiten dituzte. “Guraso baten proposamena izan zen eta hor hasi zen beste Sendi bat”, dio Solozabalek. “Gaur egun harriduraz ikusten dugu nola inguruko herrietan dena den edo gurasoentzat edo umeentzat. Ekintza gutxi daude familiak elkartzea proposatzen dutenak”.
Garrantzia handia ematen diote ezaugarri honi Egizu elkartean. “Tailerretan sarri ikusten dugu nola ume batek lehenengo aldiz entzuten duen bere gurasoa beste guraso batekin euskaraz. Gertatzen da baita ere familia bateko gurasoak eta seme-alabek lehenengo aldiz egitea zerbait elkarrekin euskaraz. Gauza txikiak badira ere konturatzen zara aldaketa bat eragin duzula familia horren hizkuntza edo jarduera ohituretan”.
Krisiaren eraginez, gainera, beste pauso bat eman dute Egizun. “Orain gurasoak dira tailerrak ematen dituztenak”, azaltzen du Solozabalek. “Egin berri dugun cookie tailerra ama batek eta haren zortzi urteko alabak eman dute. Hor gauza interesgarri asko gertatzen dira. Alde batetik sarea ehuntzen zoaz eta kasu honetan bezala ama-alabak euskaldun berriak badira eta ausartzen badira 25-30 lagunen aurrean tailer bat euskaraz ematera gainerakoek ikusten dute ez duzula zertan euskaltzaina izan behar tailer bat euskaraz emateko”.
Otsailean, maiatzean eta azaroan egiten dituzte familientzako tailerrak Sendi proiektuan. Asko dira errepikatzen duten familiak.
Olgetan euskaraz eta Hazibideak
Sendi proiektuan badituzte beste bi lan ildo nagusi. Olgetan euskaraz hiru hilabeteko prozesu bat da non guraso talde txikiak dinamizatzaile batekin elkartzen diren astean behin euskarazko baliabideak lantzeko (jolasak, kantuak…). Urtarriletik Aste Santuko oporrak bitartera egiten dute Olgetan euskaraz Getxon. “Talde gehienetan guraso euskaldunak daude baina sortu ditugu talde batzuk non ez diren euskaldunak (…) Urtero gertatzen zaigu hor ibilitako bi edo hiru guraso gero euskaltegian izena ematera animatzen direla. Euskara ikasteko motibazioa ere lortzen dute ekintza honekin”.
Hazibideak da hirugarren lan ildoa eta hezkuntzarekin eta heziketarekin lotutako hitzaldiak eta tailerrak dira. Atxikimenduaren teoria oinarri hartuta, helburua da errespetuan eta maitasunean oinarritutako hazkuntza eta harremana lantzea eta horren inguruan ikastea, hausnartzea eta eztabaidatzea, euskaraz. “Harrera oso ona dute hitzaldiek kontuan hartuta gainera formatu hori gaur egun apur bat agortuta dagoela. Jakin-mina dagoela ikusten dugu”, dio Solozabalek.
Iruzkinik ez "Getxoko Sendi proiektua: euskaraz familientzat eta familiekin"