Quantcast

78 harrera familia berri daude Gipuzkoan, baina beste 43 behar dira

Gipuzkoako Foru Aldundiak eta Beroa-Gipuzkoako Harrera Familien Elkarteak antolatuta 220 pertsonek –160 heldu eta 60 haur– parte hartu dute Donostiako Lugaritz Kultura Etxean egindako Gipuzkoako Harrera Familien XVII. Topaketan.

Maite Peña Gizarte Politikako diputatuak adierazi du gaur egun 353 harrera familia daudela Gipuzkoan; izan ere, 78 familia berri eskaini dira ume edo neraberen bat harreran hartzeko. Modu positiboan baloratu du erantzun hori, baina gaineratu du herritar gehienek ez dutela egitasmoaren inguruko berririk. “Hala ere, ez dugu ahaztu behar eragin ikaragarria duela gure haurrengan. Gero eta indar gehiago hartzen ari den zeregin hori funtsezkoa da adingabeen beharrei erantzun egokia emateko”, azaldu du Peñak.

Familia gehiago behar dira

Gizarte Politikako diputatuak eman dituen datuen arabera une honetan Aldundiaren tutoretzapeko zentroetan dauden 342 adingabeetatik 43 bideratuta daude eta prest harrera familiak aurkitzen diren unean zentrotik ateratzeko . “Familia bat behar dute, beraien zaintza eta heziketaren kargu egingo dena; baina familia horretako beste kide bat izateaz gain, jatorrizko familiarekin harremanetan jarraitzeko aukera ere nahi dute, nahiz eta beraiekin ez bizi”.

Diputatuak adierazi du Gipuzkoan familia harrera dela gehien erabiltzen den harrera mota, egoitza harreraren gainetik.  Hori argiagoa da oraindik 12 urtetik beherako umeen kasuan. “Zergatik esaten dut hori? Zeren eta, adin horren azpitik, jatorrizko familietatik apartatu behar izan diren lau umetatik hiru familia harreran daudelako. Gainera, esan dezakegu Foru Aldundiaren tutoretzapean dauden sei urtez beherako haur gehienak harrera familia batean daudela”.

Hala ere, nahiz eta Gipuzkoan familia harrera finkatuta egon, horrek ez du esan nahi alor horretako premia guztiak beteta daudenik. Alderantziz, “haur bat edo gehiago hartzeko prest dauden familia berrien beharra dugu etengabe; eta beti daude haur edo nerabeak familia baten zain”. Diputatuak azaldu du Gipuzkoako Foru Aldundiaren tutoretzapeko harrera zentroetan bizi diren haurrek “arreta egokia” jasotzen badute ere haien zaintzaz arduratzen diren profesionalen aldetik, “horrek ezin duela inola ere familia baten maitasuna ordeztu”.

Harrera familia izateko baldintzak

Harrera familia izateko baldintzei dagokienez diputatuak adierazi du ez dagoela profil bakarra: “Bakarrik dauden pertsonak, bikote heterosexualak edo sexu bereko bikoteak izan daitezke, eta seguruenik une batzuetan arazoak sortuko dira, baina harrera familiek beti izango dute profesionalen laguntza arazo horiek konpontzeko”.

Hauek dira harrera familiako zerbitzuarekin harremanetan jartzeko telefonoa eta posta elektronikoa: 943 11 25 22 /  familiaharrera@gipuzkoa.eus.

Informazio gehiago eta argazkiaren iturria hemen.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading